A para caso Maximus contra Fonseca atrobe na Corsou

WILLEMSTAD - Por lo pronto lo no tin un tratamento di contenido den e caso contra Burney ‘Nini’ Fonseca. Esey tabata e resultado di e di dos session preparativo awe mainta. E motibonan ta e interogacion di dos testigo anonimo y e agenda yen di Corte mes.

Ta sospecha Fonseca di ta e conexion entre e ehecutornan y esnan cu a duna ordo pa asesina Helmin Wiels, riba 5 di mei 2013. Actualmente e ta den prizon na Hulanda despues di un sentencia den un caso di droga y labamento di placa, pasobra na Corsou su bida ta core peliger – te asta den prizon.

Testigo anomino

Ministerio Publico kier tende testigonan D5 y C3. Nan lo por duna declaracionnan cu ta sugeri culpabilidad di Fonseca. Defensa kier ta acerca, pero esey e Procurado General, mr. Gert Rip, no kier. E ta bisa cu e riesgu cu defensa lo haña sa e identidad di e testigonan D5 y C3 ta mucho grandi y cu nan bida lo core peliger si nan identidad bira conoci.

Abogado Marije Vaders, kende ta defende Fonseca, kier tin e posibilidad pa reacciona mesora riba contestanan durante e interogacion. “Lunanan por pasa, si atende esaki por eskrito. Bo ta haña contesta na cua bo no tin nada como defensa. Mi mester por reacciona mesora cu contra-pregunta. Sigur ora ta trata di testigo anonimo, defensa mester por check e confiabilidad di e declaracionnan.”

Hues mr. Maria Paulides ta reconoce e interes di e defensa, pero e ta laga e hues comisario mes tuma un desicion riba esaki. Vaders tabata contento cu Paulides a duna un proposicion: e defensa por ta presente den un espasio tapa y lo por pasa dor di e contestanan inmediatamente despues di e interogacion, pa por haci pregunta nobo mesora.

YouTube

Durante e session, e Procurado General a referi implicitamente na documentonan di e dossier di e caso aki, cu a bin resulta riba caya via YouTube. Esaki a revela cu ex-minister di Hustisia Elmer ‘Kadè’ Wilsoe ta un sospechoso den e caso aki.

E defensa kier e grabacionnan di e interogacionnan di otro testigo nobo den e caso aki. “Mi a bisa caba den mi carta cu mi no kier mustra cu niun dede acusativo, pero cu, si suminstra e grabacionnan ey, tin chens cu nan ta bay resulta riba YouTube”, Rip a reacciona.

Dos luna

Asina cu finalisa e interogacion di e testigonan nobo y haña un buraco pa henter un dia di session den corte, lo determina un fecha pa e tratamento riba contenido. Esey lo ta minimalmente dos luna despues. Vaders a pidi e lapso di tempo ey, pa e tin tempo amplio pa consulta cu su cliente tocante e eventual informacion nobo, disponibel e ora ey.

Autor Dick Drayer Foto Dick Drayer  Ret Karibense