Gerente Radisson: Problema di droga riba beach ta serio

ORANJESTAD – E problema serio di droga y guera entre proveedores di deporte acuatico riba Palm Beach, ta coriendo cu e turistanan di e.o. Radisson Hotel. “Nos a entrega un keho serca autoridad pa yuda cu e asunto aki” e gerente di Radisson Hotel, Mark Lyttleton Frances on a bisa NoticiaCla.com diabierna mainta durante un encuentro cu prensa. Segun e gerente, centenares di su huespednan a wordo confronta cu e problema riba beach, y a protesta cu carta, sigurando cu nan no ta bolbe Aruba nunca mas pa e motibo ey.

Riba e pregunta kico exactamente e problema ta, e gerente a splica cu ta e bendemento di droga y pleito entre e proveedonan cu ta sinta algun meter di otro. Rancamento di negoshi for di otro, bendemento di droga etc, ta pone cu e huespednan ta wordo confronta cu situacionnan no placentero. Bendemento di palapa, cu posiblemente ta sosode sin permiso, tambe ta crea un situacion no agradable pa e turistanan.

Segun e gerente di Radisson, no ta su hotel so, sino mayoria di e hotelnan tin e problema ey. Y nan tur ta perdiendo cliente tur dia pa e motibo ey. “E ta costa nos huesped, y e ta costa nos placa pasobra nos tin cu incentiva e huesped disgusta pa bib bek” Lyttleton ta bisa NoticiaCla.com . A ofrece e huespednan sea estadia di algun dia gratis, reduccion di tarifa di camber etc. Esey facilmente ta costa mil dollar eynan so. “Y esey no por mas”.

Berdad a pidi autoridad ayudo pero ta parse segun e gerente, cu e no ta prioridad pa nan aworaki. “E personanan ta wordo deteni, ta haya un camber gratis cu cuminda y cama, y siguiente dia nan ta liber pa haci nan maldadnan atrobe” Lyttleton ta sigui bisa. Pues e ta algo frustrante. “Loke nos kier, ta pa autoridad controla e permiso di e proveedonan y si nan no ta bon, core cu nan. Nos no kier core cu ningun hende. Nos ta encurasha hende pa haci negoshi. Pero e mester ta corecto y legal si”, e gerente a sigui splica. Mes momento e la mustra cu no tin ningun keho riba e trabou di e strandpolitie, pasobra ‘nan ta haci loke nan por’. E gerente ta manda palabra di elogio pa e hefe, pero e ta sinti cu mester haci mas pa remedia e problema y lihe.