Evelyn Wever: Mike Eman a entrega autonomia financiero

ORANJESTAD – “Mike Eman a prefera di entrega autonomia financiero en bes di haya un aanwijzing”. Asina lider di fraccion di partido MEP, Evelyn Wever Croes a reacciona, despues di tende premier Eman su conferencia. “Porfin despues di 7 dia den silencio, prome minister Mike Eman a duna cara na pueblo. Un prome minister hopi nervioso y insigur a duna un conferencia di prensa, den cual el ‘a elogia varios persona, cu excepcion di minister di finanzas Juan David Yrausquin, cu probablemente ta esun cu a traha mas duro cu tur pa yega na un solucion di e problema serio aki” Wever a bisa.

Wever ta conclui cu aparentemente e impasse constitucional ta yegando na su final, como cu gobierno di Hulanda y di Aruba a yega na palabracionnan di condicionnan severo bou di cual Gobernador lo por firma e presupuesto 2014. Repasa e loke Aruba a yega na acuerdo  cune, esta e condicionnan menciona diahuebs merdia prome cu gobernador firma, e ta opina cu cos pues no ta cla ainda y cu nos ta bek na e comienso di e crisis.

Interpretacion di Wever ta, cu esaki gobierno di Aruba ta acepta cu gobernador tin e autoridad pa nenga di aproba un ley manera e presupuesto, y tambe ta mustra kico ta bai pasa di awor en adelante. Wever sinembargo no ta bisa si su fraccion ta di acuerdo cu e poder cu gobernador tin, sino mas bien ta solamente relata e situacion pinta awo. Contrario na Eman, -cu a nenga di yama y considera e comision proximo como CFT-, Wever si ta bay asina leeuw di yama e comision CFT, argumentando si cu e ta conciente cu nan lo yame algo otro. “ Un autoridad cu awor ainda ta completamente den man di gobierno di Aruba, entrante awe lo pasa den man di un comision independiente, controla pa Hulanda y Aruba” Wever ta bisa, concluyendo cu ‘ nos autonomia financiero manera nos a conoce desde 1986 a yega na su final.” Pa Wever, ta obvio cu e prome minister di pais Aruba pa evita di haya un ‘aanwijzing’, a prefera di entrega e autonomia financiero di nos pais. Wever ta considera e episodio aki como un advertencia grandi pa AVP, un berguensa pa nos pais, algo cu hamas mester a tuma lugar. “Un crisis cu a te hasta pone Mike Eman den "comma" y silencia 7 dia!”