PwC a tene su evento ‘Big Data on a small island’

ORANJESTAD – Diamars cu a pasa, PwC Aruba a organisa su prome evento di Big Data yama ‘Big Data on a small island.’ Big Data ta un terminologia cu ta wordo uza pa describi un cantidad inmenso di informacion digital. Por ehempel, cada biaha cu informacion di un persona wordo hinca den computer, e computer ta warda e informacion aki. E informacion aki na su turno por wordo uza pa un bon causa sea commercial of investigativo. 

E dia a conta cu mas o menos 25 representante di diferente compania aki na Aruba. Edsel Lopez, Partner PwC Dutch Caribbean a habri e evento gradiciendo tur compania presente y a splica e posibilidadnan cu Big Data por trece cu ne pa companianan y instancianan local. Despues a sigui cu Ruben Goedhoop, Directo Advisory pa PwC Dutch Caribbean kende na su turno a splica con e proceso a bay pa trece e servicio aki Aruba. PwC Aruba a cuminsa dos aña pasa cu e proceso di trece Big Data na Aruba y asina a sinta hunto cu André Mikkers di PwC Hulanda pa colabora riba e area aki. Tambe Ruben a splica con importante ta pa Aruba como isla chikito pa ta up-to-date pa loke ta trata di Big Data y bira un “Sillicon Island”. Ruben a menciona cu na Aruba hopi companianan ainda no ta collectando data of tin data, pero no ta uzando esaki na un forma effectivo. Pa e motibo aki e obhetivo di e evento tabata pa informa companianan y instancianan con nan por uza Big Data y combina data (informacion) di diferente systema pa yuda nan optimalisa nan organisacion. 

André Mikkers, Partner Forensics and European Data Analytics leader, a elabora mas tocante e strategia di PwC Global Data & Analytics. Den e parti aki André a conta over di e laboratorio “Data Experience Lab” na Amsterdam y a duna diferente ehemplenan di proyectonan cu a wordo ehecuta na Hulanda y nan resultado, y con relevante uso di data ta y con hopi oportunidad esaki lo trece cu ne. Despues di esaki, Gunilla Verbeke, Manager Forensics & Technology Solutions a duna diferente ehempel con data y informacion por wordo uza den compania nan pa analisa differente aspecto. E dia a sigui cu Glenn Thodé, rector di Universidad di Aruba y president di e comision di proteccion di dato personal BES, cu a papia over e aspecto legal ora ta trata di proteccion di dato personal ariba nivel nacional, regional y global. Glenn a splica cu e ley di privacidad na Aruba ta limita organisacionan pa comparti nan data cu otro instancianan. Aruba ainda no tin leynan di privacidad moderno manera otro paisnan na mundo y tampoco no tin un organisacion independiente cu ta controla esaki. Sigur esaki lo ta un area cu mester bay adhusta pa asina por facilita companianan pa haci mas uzo di data. 

Despues Jacques de Swart, Partner Data & Analytics, a sigui cu duna ehempel di diferente tools cu PwC ta uza pa haci analisis cu data pa asina companianan por tuma decision over di nan strategia sea ta trata di un producto, recurso humano of mantencion. Tur esaki por wordo analisa cu data cu e compania mes ta produci den combinacion cu otro data cu ta obtenibel publicamente. Ruben Goedhoop a clausura e dia na unda oficialmente a lansa e servicio di “Data Analytics Lab & Services”, un servicio nobo y unico den Caribe. 

PricewaterhouseCoopers Aruba, L.G. Smith Boulevard 62, Oranjestad, Aruba T: (+297) 522 1647 , F: (+297) 582 4864, www.pwc.com/dutch-caribbean 

E participantenan a keda masha satisfecho cu e evento y a expresa nan interes pa e fenomeno di Big Data. Cu esaki PwC Aruba ta duna inicio na un era nobo pa loke ta trata innovacion, no solamente na Aruba pero tambe den Caribe.