Corte a ordena Aruba Airlines pa paga ex CEO Onno de Swart

ORANJESTAD - Aruba Luchtvaart Maatschappij NV, comercialmente conoci como Aruba Airlines tin cu paga su ex CEO Onno de Swart e suma di AFL 172.500,= cu e tin derecho riba dje. Asina hues a dicta den un sentencia diaranson, rechasando asina e peticion di Aruba Airlines pa prohibi e ehecucion di e sentencia cu ta ordena e pago menciona. No ta conoci ki dia e aeroliña tin cu paga de Swart e suma, mirando cu e termino pa a paga, a vence diaranson. 

CASO SUMARIO

Tabata Aruba Airlines cu siman pasa den un caso sumario a pidi hues pa prohibi ehecucion di e sentencia di dia 13 april 2016, cu ta dicta cu e aeroliña mester a paga e suma menciona, den un termino di 120 dia. Un di e motibonan duna, ta cu Aruba Airlines a apela e sentencia menciona, y cu e caso di apelacion mester tuma lugar proximamente. Ademas, a resulta den corte segun abogado di e aeroliña, cu e compania ta den un situacion financiero turbulento. Algo cu hues a remarca cu no ta algo nobo y cu e compania te hasta tabatin e forma pa garantia di banco pa e suma pendiente e veredicto. Nada no ta haci, segun corte, cu e mesun 'ayudo financiero' por wordo uza pa facilita eventual pago na de Swart sin cu e ta perhudica e compania financieramente. Fayo di e aeroliña pa investiga e aprobacion di pago di e suma na de Swart (indicando cu ela haya aprobacion pa e suma basa riba un firma cu a wordo ubica como error riba documentonan necesario) no por wordo tira como un fayo di de Swart, segun corte. Ademas esaki no ta wordo considera como hechos nobo cu por tin influencia riba e caso.

Basa riba tur e informacion aki, hues a rechasa e peticion di e abogado di e compania, y a dicta na fabor di de Swart.