Croes: Aruparking ta recorda prome aña, cu hopi reto y logro

ORANJESTAD - Un aña despues di su introduccion, yen di problema despues y faltando apenas un fase pa introduci, e director Teo Croes por wak atras riba un prome aña exitoso di Aruparking, Asina Croes a splica NoticiaCla.com riba e prome aniversario di e compania. Di otro banda, politiconan y cierto gremio comercial ta mustra cu e parkeermeter no tabata bon y cu el a mata comercio y Playa. Varios investigacion a mustra versionan diferente. Gremionan no tabatin problema cu concepto, sino mas bien su ehecucion. Un aña despues, e comentarionan ta varia. Pero pa e compania mes, nan ta mustra satisfecho. 

COMIENSO DIFICIL

El a bisa cu na cuminsamento di Aruparking e situacion tabata un poco dificil, tabatin algun contratiempo y hopi tegenwerking entre otro, pero a lo largo di e aña a bin ta superando esakinan stap pa stap y awor por bisa cu Aruparking ta canando manera mester ta. 1 aña despues por bisa cu e aceptacion pa Aruparking a bin ta creciendo y ta basta grandi unda cu por mira cu e ocupacion ta subi mas y mas.

META LOGRA

Igualmente Sr. Croes a bisa cu e meta pa cual Aruparking a wordo funda, esta seguridad y accesibilidad den centro di ciudad ya caba por mira e frutanan di dje tambe. “Si bo mira con caya ta na e momentonan aki e ta mustra un caya full ordena, bo ta mira cu e peliger pa e peatonnan no ta existi mas manera cu tabata prome unda autonan ta para riba acera y peatonnan mester a baha riba caminda y tambe e paramento na skina y otro lugarnan prohibi a wordo elimina, evitando accidentnan”, Director di Aruparking a duna di conoce.

DUNA MAS INFORMACION CU POR

Mirando cu ainda toch ta presenta algun caso unda no ta cumpli cu e reglanan manera debe ser, Aruparking ta purba duna mas tanto informacion posibel den diferente forma pa e por yega na tur usuario. Inclusive e parkeerwachternan ta splica e turistanan riba parkeo paga y si mester con pa uza e parkeermeternan y esaki tambe na e localnan cu mester un tiki mas guia di e uzo. Idea no ta pa castiga hende, idea ta pa duna servicio mehorando seguridad y accesibilidad di nos centro di ciudad.

ADAPTACIONAN HACI

Durante e aña aki tambe a adapta orarionan, cierto zonanan di parkeo gratis y tambe tarifanan. A pesar di e cambionan aki por mira cu e crecemento di ocupacion a keda stabil, pasobra si ta dunando parkeo gratis na diferente zona, ta cuminsa cobra for di 9or di mainta y a reduci tarifanan esaki ta disminui entradanan den cierto forma, esaki kiermen cu e hendenan ta uzando e parkeo paga cada bes mas. Croes a indica tambe cu Aruparking ta dunando sosten na Caya Grandi no solamente den accesibilidad y tambe cooperacion cu tiendanan, pero tambe den sentido di seguridad. Actualmente patras di La Moderna no tin casi kibramento di auto mas, pasobra e presencia di Aruparking ta yuda. Tambe ta yudando pa mantene nos isla limpi unda cu e parkeerwachternan ta purba lanta e sushi cu nan topa riba caminda y otro formanan di contribui na bienestar di nos centro di ciudad.

Aruparking kier a gradici tur usuario cu a acepta Aruparking y ta keda invita tur otro persona cu ainda no a bin pa pasa y mira tur e ventahanan cu tin ora bishita Caya Grandi. 

Centro di ciudad un aña despues ta mustra hopi mas organisa y cu mayor seguridad, dos factor cu ta demostra e derecho di existencia di Aruparking.