Mark Lyttleton: Hotel lo no sera porta si bende e edificio di Radisson

ORANJESTAD – Ni Riu hotels, ni Sandals ta interesa pa cumpra e edificio di Radisson Hotel. Gerente general di Aruba Radisson Mark Lyttleton Frances a sigura esey na prensa diabierna mainta . Ta berdad cu e compania madre di Radisson Hotel, Carlson Rezidor Group, ta bendiendo e edificio pero no ta asina cu e hotel lo sera su porta e ora manera a sosode cu otro hotelnan. Y a traha cu gobierno hopi di serca cu e posibilidad pa mantene Radisson mes como e operador, debi na e bon relacion cu semper e compania tabatin cu Aruba. Asina e gerente a garantisa prensa mes momento.

E gerente a splica e proceso di benta di e edificio y cu ta spera cu por keda cla cu e situacion aki dentro den mas tempran, un of dos siman. “Aunke e por dura te cu comienso di otro aña” Lyttleton a confia na NoticiaCla.com. E proceso cu a cuminsa comienso di aña, ta cu a pone notificacion internacional cu ta buscando inversionistanan pa inverti den e propiedad na Aruba ya cu e ta e unico ainda di tur den region, cu Carlson Rezidor ta doño di dje. Dia 6 di augustus a sera e proceso di licitacion pa haya inversionista, for di cual a haya entre 10 pa 13 inversionista cu tabata interesa. Mayoria di nan tabata inversionistanan institucional cu ta cumpra sea pa duracion largo of cortico. Mayoria di duracion largo. “Entre nan tabatin algun cu kier a inverti, pero no por a demostra cu nan tin e placa y tabatin otronan tambe cu no tabata mucho serio. Pero mi tin e confiansa cu di loke mi a wak, Radisson lo por keda cu su nomber, ora cu e proceso di compra termina, cu un contracto pa maneha esaki pa e doño nobo” Lyttleton a sigura. Loke sigur e gerente a sigura ta cu e hotel, contrario na otronan manera e.o. Westin, lo no sera su portanan despues di un eventual benta, pa sea remodela of reconstrui. “Esey lo no pasa. Keremi. Lo mester ta un arabier cu hopi hopi placa, cu ta pone abou pa por logra algo asina” Lyttleton a sigura NoticiaCla.com. “No ta pasobra bo tin hopi placa, bo por cumpra e propiedad. Nos lo no permiti esey”.

Awor cu ‘prome fase’ a pasa, ta yega e di dos fase cu ta seleccion di esnan mas cualifica, pa nan haci un eventual ‘due diligence’ cu ta un analisis integro di e propiedad pa asina mira tur cifra, edificio personalmente y sondea lo demas pa tin un miho bista riba e loke nan ta interesa den cumpra. Pero porta tambe cu e loke cu e doñonan actual ta mira den e grupo interesa, ta asina bon cu nan ta opta pa mesora duna e contracto na e grupo aki. “Nos ta spera cu dentro di 1 pa dos siman tin esey tras di lomba, aunke e por dura tambe mas largo”. Por ta cu e hotel ta cambia di operador, y cu e cortina ta sera pa Radisson, y ora cu e cortina lanta atrobe, tin un otro cadena cu ta opera e hotel. “Esey lo ta e unico cambio pa e trahadonan. Cu nan ora e cortina habri, nan tin uniform di un otro compania. Nada mas”. Pero e gerente tin confiansa cu e ta keda Radisson hotel.