InselAir: Ta compensa ora di problema, mas cu otro aeroliñanan

WILLEMSTAD - InselAir ta compensa ora di problema, mas cu otro aeroliñanan ta haci. Y asina mes hende ta critica. Asina CEO di InselAir International Edward Heerenveen ta bisa NoticiaCla.com. Mes momento, ta acepta cu tin cu traha riba nan forma di comunica cu pasahero hopi biaha. Un di e problemanan cu e aeroliña InselAir a confronta ultimo tempo, ta e falta di comunicacion entre personal y pasahero. Algo cu e CEO di InselAir international Edward Heerenveen ta compronde. Den un reaccion pa NoticiaCla.com, e ta bisa cu e sa di e critica y ta compronde cu hendenan nan kier informacion. 

COMPRONDE PROBLEMA

"Nos ta busca forma di duna informacion hopi biaha" Heerenveen ta bisa. Pero ora cu ta trata di tempo, e personanan no por bisa nada y tin cu warda wak e tempo habri. Anto hende no ta gusta tende esey". Nan kier biaha. "Di otro banda si tin un avion daña, e momento ey e unico cos cu por bisa, ta cu 'tin un delay pasobra tin problema cu e avion. A pidi un ora pa nan wak e delay. Aki un ora nos ta yamabo bek'. Pero hende no kier sa esey. Nan kier sa ki ora nan t'ey sali" Heerenveen a bisa. 

CON PA SPLICA FAYO TECHNICO

Problema ora di un fayo technico ta, cu e personal no por papia pa technische dienst, mientras cu e technische dienst tin cu wak busca unda e problema a origina. E ora nan por dicidi con pa drech'e y con largo esaki ta dura pa drecha. "E ora nan por bisa cuanto tempo ta dura pa por keda cla" Heerenveen a bisa. Den exterior ta uza otro tactica unda cu p.e. ta bisa cu e avion ta dura 4 ora, siendo cu e por dura menos y e ora e sla ta menos. Na Corsou, segun Heerenveen, ta haci e cos contrario. "Mi no kier bisa un hende cu tin 4 ora di vertraging, cu e por keda cla den 2 ora" Heerenveen a bisa. A opta pa no cambia nan politica di avion, pa evita mas problema. Bisa hende cu ta bay dura mas largo, ta duna hende chens pa bandona aeropuerto, cu e chens cu ora cu e avion ta cla, nan no t'ey e ora. 

FAYO DI INFORMACION

"Cu tin hopi bes un lek di informacion, nos sa y ta busca forma di tap'e mas hopi cu ta posibel pero ya, ora cu ta algo techisch bo tin cu warda riba e techniconan pa bisabo ta ki ora. Y mi no kier duna un tempo exagera djies pa kita nan for di mi curpa"

COMPENSACION DI BUELO

Riba e aspecto di compensacion den caso di fayo di avion, no tin den e region aki un politica cu ta bisa cu bo tin cu paga hende. "Loke tin si ta un cos di ICAO cu ta bisa cu ora cu bo tin vertraging, despues di di 2 ora bo tin cu duna hende co'i bebe, y despues di 3 ora algo di come. Nos ta atene nos mes cabalmente na esey" Heerenveen a bisa. InselAir ta duna mas tanto cuminsa posibel si e cos dura mucho largo. Ademas, tin hende cu ora cu tin 5 ora retraso, ta haya pida di ticket ey di destinacion, un biahe bek. Dus nan ta duna e porcion di one way bek. "Ya caba otro biaha cu nan cumpra un ticket, nan tin 50% korting caba. Pero esey si bo no ta tende ningun hende papia riba dje. Algo cu nos tin 10 aña caba. Mi no tin e deber di haci'e, pero ta haci'e toch. Den caso di 'act of God', mi no tin cu duna nan nada. Ni cuminsa, pasobra no ta mi falta". Awendia hende ta tum'e 'for granted' cu asina cu tin tormenta, hende ta pensa 'InselAir' lo paga mi hotel. Otro aeroliña internacional no ta haci'e, y ta cosnan asina ta haci Heerenveen tristo pasobra nos hendenan sa bon bon con reglanan ta, y ta aprobecha.