De Coteau: Aruba no ta cla por lo pronto pa ricibi ferry Venezolano

ORANJESTAD - Problema cu e asunto di ferry Venezolano no ta cu nan kier bin Aruba, sino cu nan a dicidi (riba nan mes) cu nan lo cuminsa opera riba un tal fecha. "Esey ta e issue grandi pa nos na Aruba" Carlyle de Coteau, hefe di directie Scheepvaart a bisa NoticiaCla.com diaranson. "Bo por wel tin'e den bo business plan cu bo ta cla pa opera un servicio di ferry entre Venezuela y Aruba na october, pero si Aruba no ta cla pa ricibi bo, ta mesun cos bo ta keda" de Coteau a sigui bisa. E asunto no ta di permiso pa nan por yega Aruba, sino cu autoridad na Aruba no ta prepara y cla aworaki pa ricibi nan. E hecho cu mandatarionan no ta na altura di e plan, no ta nada straño. "E por pasa. Ningun di e mandatarionan no tabata sa di nada. Esey ta corecto".

PAKICO FERRY NO POR CUMINSA AINDA

E compania di ferry Naviera Paraguana no por cuminsa na october proximo, manera cu nan a anuncia segun de Coteau. Segun e hefe di directie scheepvaart, den un reunion cu autoridadnan respectivo, inmigracion y douane a inform'e y APA cu nan no ta cla pa ricibi ningun ferry na october of na november of den prome parti di 2017. E compania lo a puntra APA si nan por bin Aruba, si tin slot, y esaki no tabata problema. Esey no ta traduci automaticamente cu bo ta haya un permiso di APA pa yega na october segun de Coteau. E problema no ta pa haya permiso pa yega Aruba y mara na waf, y tambe pa drenta awa teritorial di Aruba manera tur otro barco segun tratado internacional. "Pero nan no por cuminsa opera (como un servicio di ferry), pasobra ni inmigracion, ni douane ni APA no ta cla pa ricibi nan" de Coteau a sigui bisa. 

RESPONSABILIDAD DIRECTIE SCHEEPVAART

E responsabilidad di e departamento cu de Coteau ta maneha, ta cu e barco cu ta nabega, ta suficientemente sigur, cu e pasaheronan por biaha safe, y cu nan ta haya permiso pa drenta awa teritorial di Aruba door di havenmeester." Esey ta nos competencia como directie Scheepvaart" de Coteau a bisa. 

DUNA PERMISO DI OPERACION

E motibo pa cual no por duna permiso pa e operacion aki cuminsa, ta pasobra e.o. douane ta bisa cu mester di un sorto di lugar pa ricibi nan pa procesa p.e. 600 hende y 400 cu ta bay bek. "Cu e prijsnan cu nan ta bay duna, keremi cu nos Arubianonan tambe ta bay haci uzo di esey" de Coteau a bisa. Mester tin un tipo di terminal pa ricibi y procesa e cantidad di hendenan aki. "APA no tin'e, y e otro departamentonan no tin. No tin e sistema di p.e. radex, personal y mucho mas. Tin varios ministerio cu tin cu keda envolvi pa si e inversionnan tin cu tuma lugar pa por ricibi e ferry aki.