Maltempo pareu riba varios ruta, causa di tanto problema

WILLEMSTAD - E retrasonan cu a sosode ultimo dianan cu Insel Air pa gran parti tabata ocasiona pa mal tempo na destinacionnan cu e compania ta bula. Asina e hefe di Insel Air Edward Heerenveen a confirma na NoticiaCla.com diaranson. Destinacionnan manera Sto Domingo y Baranquilla tabatin problema di tempo cu a tranca varios buelo cu a perhudica na su turno, e biaheronan cu mester a yega Corsou pa e festival di North Sea Jazz. 

MAL TEMPO NA BARANQUILLA

E buelo pa Baranquilla tabata diahuebs anochi pero pa motibo di mal tempo, no por a aterisa eynan. "A keda draai eyribanan casi 3 cuarto di ora y despues a bin Corsou pasobra no tabata mira un mehoransa den e weer" Heerenveen a bisa. E avion a yega bek madruga cu tur e pasaheronan. Na Corsou mientrastanto aunke cu no tin ningun obligacion pa hinca hende den hotel ( pasobra no ta falta di e aeroliña basa riba e teoria 'act of God'), a busca toch pa haci esaki. Sinembargo pa motibo di e festival, tur hotel tabata yen. 

E hendenan aki mainta a bira fastioso exigiendo cu nan tabata kier bay nan destinacion bek. "Esey a pone cu e muchanan cu ta traha pa nos, a wordo agredi cada bes di nobo. A agredi nan asina tanto e biaha aki cu mi mes a bay aeropuerto pa papia cu e hendenan aki" Heerenveen a sigui bisa. A purba trankilisa e situacion y a logra hiba e hendenan aki diabierna anochi. Esey tabata un problema riba su mes pasobra a saca un avion cu a impacta resto di e itinerario. 

EFECTO DESPUES DI NORTH SEA JAZZ

Dialuna mester a cuminsa hiba hendenan di North Sea Jazz bek, cu a cuminsa de hecho diadomingo caba. "Esey a bay relativamente bon aunke tabatin e stress di e dia prome" Heerenveen a sigui bisa. Entre e destinacionan dialuna, tabatin buelo pa St Maarten, unda cu aki tambe tabatin un tormenta tremendo. Esey a causa un retraso di por lo menos 5 ora cu Insel mester a warda na Corsou pa e tempo na St Maarten drecha. A dicidi di cancela e buelo finalmente, causando mas iritacion ora cu hendenan di e buelo a cuminsa exigi InselAir pa bula nan toch. "Nos no ta tuma e chantagenan ey, pasobra ami ta bisa cu e hendenan su bida ta hopi balioso y tambe esun di e crew y e estado di e avion(nan)". E hendenan a agredi e trahadonan fuertemente y hasta riba facebook, segun e CEO. "Pero nan no tin rason. Ta un 'acto of God', mi no por baha den un tormenta" Heerenveen a sigui bisa. A dicidi di hiba nan un dia despues riba un buelo directo pa St Maarten. Ora di bay, mester a saca un buelo extra paralel na esey pa laga e buelo normal pa St Maarten tambe sali. Malasuerte a toca InselAir atrobe ora cu a bin topa despues cu un tormenta na Sto Domingo cu tabata e siguiente destinacion despues di St Maarten. Eynan a surgi mas problema ora cu Sto Domingo su aeropuerto a dal cera cu a significa cu no por a sigui e buelo. A cancela Sto Domingo y bin Corsou bek cu e hendenan di e dia prome. Pues problema riba problema e compania tabata haya. Haiti tambe a haya problema cu tempo, pues tur e destinacionan cu InselAir tabata bula, tabatin problema cu tempo. "Tur esaki ta pasando pareu riba e rutanan cu nos ta bula. Y e unico cos cu por haci ta warda of cancela" Heerenveen a sigui bisa. Mientrastanto tur e pasaheronan pega mester a wordo busca y hiba, causando un extra peso financiero y operacional riba e compania. Segun Heerenveen, e operacion ey a costa mas esfuerso, ya cu mester a uza avion mas grandi, mas costoso, pone otronan riba otro aeroliña, contal cu nan yega nan destinacion.