Wever-Croes: Sevinger a regala 42 mil m2 na compania fantasma

ORANJESTAD - Manera ta conoci Parlamento a yama minister Benny Sevinger pa duna cuenta. Lider di MEP Evelyn Wever-Croes cu prueba den man a denuncia e actonan dudoso y cuestionabel di e minister y esnan cerca di e minister. Lider di MEP a presenta prueba di negoshi di tereno na momento cu e minister a duna 42 mil m2 na un compania fantasma pa construi hotel na Seroe Colorado. Aki no ta trata di e hotel di Otmar Oduber, sino un otro hotel cu hendenan di Benny Sevinger ta envolvi aden. 

PETICION DI SUBRINO

Segun Wever, e persona cu a haci e peticion ta un hoben, subrino di doño di Canal 90. " El a manda un carta pa minister pa pidi 42 mil m2 sin duna mas documento. No tin mapa, ni business plan, ni garantia di banco, y pa colmo ni e compania cu ela firma den su nomber tabata existi. Pues un compania fantasma. Pero Benny Sevinger a aproba esaki e mesun dia si! " Wever a sigui bisa.  E peticion a wordo entrega dia 15 di september 2014 segun Wever,  ela wordo aproba mesun dia pa e minister sin cu e minister por a wak cu e compania no tabata existi! " Pasobra si e minister a simplemente GOOGLE riba website di Camara di Comercio e por a mira cu e compania no ta existi. Cu e compania ta fantasma!"

LANTA COMPANIA 

Ta 5 november 2015, kiermen un luna y mey despues cu minister a duna 42 mil m2 na e compania fantasma, e hoben a core bay lanta e compania na notario. Segun Wever, esaki ta un procedura masha masha straño mes. "Cosnan masha dudoso a tuma lugar akinan. Abo no ta kere cu ta bon pa investiga esaki?" Wever a sigui bisa. Esaki no ta e unico ehempel cu Lider di MEP a trece padilanti di terenonan cu a bay pa companianan fantasma. Ta varios ehempel el a duna, durante su presentacion den Parlamento. 

MOCION

P'esey MEP a entrega un mocion pa laga investiga e minister y su actonan cuestionabel aki. E reunion ta continua diabierna awor 1.30 pm. "E momento ey e minister mester bai duna splicacion dicon ela regala 42 mil m2 na un compania fantasma" lider di MEP Evelyn Wever-Croes a duna di conoce.