UA ta lansa programa 'Double Degree Master International y European Tax Law'

ORANJESTAD - Yena di anticipacion y entusiasmo e prome grupo di studiantenan a cuminsa cu e programa di e “Double Degree Master International and European Tax Law”.  E prestigioso programa aki ta e resultado di un bon cooperacion entre Universidad di Maastricht y Universidad di Aruba y a wordo aproba pa ambos e Gobierno di Aruba y e Gobierno di Hulanda. 

Dia 5 di september 2016, Minister di Finansa y Organisacion, señor Angel R. Bermudez, hunto cu profesora Anouk Bollen-Vandenboorn cu ta di e Universidad di Maastricht y tambe directora di e “Double Degree Master Programme” a lansa e programa aki oficialmente.

E doctorado aki ta wordo ehecuta door di un grupo di profesornan international, di entre otro Aruba Brazil, Hulanda, Inglatera, Merca y Venezuela. 

E programa aki ta specialmente dirigi pa studiantenan y personanan cu ya tin un trabou of cu ta desea di tin un profesion den e ramo international. E programa aki por lo tanto ta ofrece experiencia riba e tereno di impuestonan international como tambe e ta crea enlace cu e impuestonan di Europa. E programa lo haci esey di un perspectiva international cu un enfasis riba e sistemanan fiscal den e region di Caribe y Latino America. 

Durante e aña academico 2016-2017, lo ofrece e siguiente cursonan den e area di: 

-  Comparative Corporate Taxation; 

-  Comparative Dutch Caribbean and Latin American Tax Law; 

-  International and European Tax Law; 

-  International Taxation of Business Income; 

-  US Tax Law; 

-  International Tax Planning and Transfer Pricing; 

-  Global and EU Perspectives on Consumption Taxes; 

-  Cross-Border Taxation of Human Capital. E programa di e “Double Degree Master ” lo start tur aña den e luna di september, na unda cu e cursonan menciona prome lo por wordo duna separa tambe. Si tin algun pregunta of comentario, por tuma contacto cu e coordinadora di e programa di “Double Degree Master ” esta Sra. Sandy P. van Thol (sandy.vanthol@ua.aw). E inscripcion pa e aña academico 2017-2018 ya caba ta posibel. Pa mas informacion, por acudi na e website di www.maastrichtuniversity.nl/law/aruba. Foto: www.loopabc.com