Polis gara boto "Ki-Diaaa" cu a sali ilegal for di Aruba

ORANJESTAD - Diamars pa 3:30pm durante control di Polisnan Maritimo y Warda Costa na costa, a observa via radar, un boto a sali for di e waf pariba di waf di Barcadera, sali di Mangel Halto y bay direccion Venezuela. A constata via radar cu e boto aki a sali for di awanan teritorial di Aruba y a yega te na costa di peninsula di Paraguana na Venezuela. 

E CASO

Pa mas o menos 6:30pm e boto a bin bek direccion Aruba direccion Valero. Mesora a despacha e boto di Polis, BP-2, direccion Valero. Na mas o menos 1 miya di Valero a intercepta e boto aki y a resulta di ta registra cu e matricula A-900 bou nomber "Ki-Diaaa". A constata cu tabatin 3 persona abordo. 

KLAAR UIT

Polis Maritimo a check cu Inmigracion si e boto aki a "klaar uit" legalmente di Aruba. A resulta cu e boto menciona no a "klaar uit" y a sali ilegalmente. BP-2 a bay cu e boto aki na waf di Barcadera y a pone Douane y Inmigracion na altura. A resulta cu e boto aki a sali ilegalmente for di Aruba y a bay busca "fuel" na Venezuela y kier a drenta ilegalmente Aruba. 

ADUANA

Aduana a tuma contacto cu Fiscal di Ministerio Publico y mirando cu ta "first offender" a impone un multa di Afl. 1.000,=. Si e caso mester ripiti, lo por haya un multa di Afl. 5.000,=. NOTA DI NOTICIACLA: A ricibi e potretnan den e calidad aki.