E ferry Venezolano no tin permiso pa opera na Aruba

ORANJESTAD - E compania di ferry Venezolano cu ta den discusion aworaki, no tin permiso pa opera na Aruba segun hefe di despacho di minister Mike de Meza, Richard Arends.  "Nos tampoco no tabata na altura" hefe despacho di minister Mike de Meza, Richard Arends, a bisa NoticiaCla.com. E ta reacciona asina riba e articulo di e ferry Venezolano cu ta cla pa cuminsa bin Aruba otro luna. Arends ta uni su mes cu e grupo di gobernante cu dialuna a informa e portal aki cu nan no tabata na altura mes di e plan di ferry. " Nos no ta na altura si e lo opera for di Aruba. Si esey ta e caso, lo e mester pidi un vestigingsvergunning" Arends a bisa e portal aki. Segun Arends, ningun peticion a drenta pa establece un negoshi asina na Aruba. 

MINISTER DI TRANSPORTE

Minister Oduber den calidad di minister di Transporte, a elabora mas awe riba su pagina di Facebook. "Ta lamenta cu un compania ta anuncia un operacion di Ferry, sin cu esaki ta conoci na instancianan concerni y departamentonan di gobierno. Ni Ministerio di transporte, ni ATA a wordo consulta" Oduber a bisa.

REACCION SORPRENDENTE

Prome minister Mike Eman, minister Benny Sevinger y minister Otmar Oduber den nan reaccion inicial na e portal aki dialuna a desmenti di sa algo di e proyecto. "Mi no sa nada di e proyecto ey" Eman a sigura NoticiaCla.com dialuna mainta. Sevinger tambe a desmenti y a manda nos check cu colega Oduber cu ta esun encarga cu transporte. Pero ora cu a tuma contacto cu e mandatario, su reaccion tambe tabata den mesun direccion "Ministerio di transporte y/of turismo no tin ningun info di e supuesto ferry. Esaki no ta un proyecto di minister of ATA!" Oduber. Den otro medionan minister di husticia Arthur Dowers tambe a mustra di no sa nada. Esey ta nifica cu tin un proyecto cu ta bay cuminsa, cu por tin un embergadura grandi pa e fluho entre Aruba y Venezuela, sin cu gobierno ta 'oficialmente' na altura di dje. Si esey ta un problema no ta conoci. 

E COMPANIA VENEZOLANO

Mientras cu siman pasa e compania cu ta opera bou di e nomber "Naviera Paraguaná" publicamente a informa prensa di Aruba di nan plan, investigacion cu NoticiaCla.com a haci, ta mustra cu for di mei caba e compania a informa na Venezuela di e plan pa cuminsa cu e servicio. E momento ey, e servicio mester a cuminsa for di luna di juli. Romny Merceoleo, vicepresidente di Naviera Paraguaná, e consorcio priva cu ta responsabel pa conecta Venezuela cu e islanan ABC, a splica cu for di 6 di mei ultimo, e ferry cu nan lo a uza, a sali for di Grecia, rumbo pa Venezuela.