Debi na restructuracion, Radisson lo por ofrece pakete na maximo 40 trahado

ORANJESTAD – Cu cualkier proceso di benta y cambio ta bin un proceso di restructuracion manera den e caso di Radisson. Esaki no kier men retiro masivo sino cambionan pa modernisa e compania y pa por crece esaki miho ainda. Como parti di e restructuracion aki, Radisson lo por ofrece pakete na maximo 40 trahado proximamente. Tur trahado di Radisson Hotel ta bon informa di kico ta pasando den e hotel y kico e posibilidadnan ta. Gerente general di e hotel Mark Lyttleton Frances a splica prensa diabierna mainta cu mientras cu e ta papia cu e trahadonan riba e futuro di hotel, e trahadonan ta prefera kere e loke cu ta para den prensa enves di su palabra. Como tal a opta pa informa prensa, y laga e trahadonan lesa e biaha aki den prensa loke ta sosodiendo y porta nan ta kere esey. Lyttleton a sigura cu e no ta precupa pa su mes, sino pa e trahadonan. “Ami ta haya trabou na Russia, of otro caminda si mester. E trahadonan aki mi kier pa nan tin e trankilidad ey tambe. Nan mester por drumi bon anochi y ta trankil cu nan tin nan trabou” e gerente a sigui bisa. E rumornan riba caya segun Lyttleton, no ta yuda e trahadonan. “Nan no merece esaki”.

 E la sigura medio diabierna mainta cu 73 hora despues cu e decision a cay cu Carlson Rezidor Group a dicidi cu ta bende e edificio, cu e la reuni cu tur trahado y splica nan tur cos. Pero ta keda e incertidumbre pasobra nan ta kere loke ta bin pafo di e rumornan. E asunto di retironan, ta confuso y no corecto. E gerente a splica cu loke ta pasando ta cu e hotel, banda di e benta di edificio, ta den proceso di restructuracion. “Y ora cu restructura un compania, algun hende tin cu bay cas”. Mes momento riba pregunta specifico di NoticiaCla.com, e gerente ta revela cu entre 16 minimo pa maximo 40 trahado lo por wordo ofreci of a wordo ofreci un pakete di retiro.

Mes momento e gerente ta sigura cu ta trata di trahadonan cu ya caba a yega nan edad di retiro, y otronan cu ya no por eherce nan funcion mas manera cu mester. E edad average di un trahado na e hotel ta 47 aña y cu 17 aña di servicio. Esey ta pone cu nan ta hopi tempo cu e hotel. Ora cu bo mester busca dos persona extra pa yuda un camarera haci su trabou regular, bo tin un problema, segun e gerente. Situacionnan asina tin y mester haya un solucion pa nan. Y ta haciendo tur lo posibel pa logra esey. Entre e otro solucionnan, ta purba wak con por uza e talento di e trahado miho posibel. Entre nan, aloca nan otro caminda unda cu si por uza nan servicionan actual. Reduccion di ora (pasobra nan ta di edad avansa cu no por traha mucho mas largo), of cambio di funcion (nan conocemento ta hopi valioso) pa nan por wordo ubica otro caminda. Tin cu ta boga pa bay pasobra nan a traha suficiente.