PAAZ Y Jordan Ling Foundation Mental Health Awareness Conference

ORANJESTAD - Dialuna atardi e departamento di PAAZ di Dr. Horacio E. Oduber Hospitaal hunto cu Jordan Ling Foundation a anuncia debi na e demanda halto cu lo bay tuma luga dia 22 di october un “Mental Health Awareness Conference”. E conferencia aki lo bay toca diferente tema cu tin di haber cu Salud Mental cual lo tuma luga na Renaissance Convention Center y entrada lo ta completamente gratis. 

Sr. Clifton Ling a habri e conferencia splicando cu a lanta un fundacion non-profit fcu ta hiba e nomber di Jordan Ling Foundation pa asina promove, yuda trece mas conocemento y conscientisa un y tur di e diferente deficiencianan mental cu un persona por tin y asina busca ayudo na e diferente instancianan aki na Aruba. Nan prome actividad di cual Jordan Ling Foundation lo participa na dje nan a cerca departamento di PAAZ pa hunto nan presenta e Mental Health Awareness conference pa e pueblo di Aruba. Esaki lo ta e comienso pa asina poco poco cuminsa kibra e stigma y papia mas tocante e topico importante aki cu ta salud mental. 

Sra. Renate Van Dongen di PAAZ a splica cu e meta principal pa un conferencia asina ta pa cuminsa kibra e stigma cu tin pa cu PAAZ y deficiencia mental. Esaki ta un malesa cu por toca cada un di nos, pero no kiermen cu mundo ta caba. Cu tratamento adecua por hiba un bida normal den comunidad. Sra. Van Dongen tambe a splica cu e conferencia aki lo ta completamente gratis y ta pa tur hende cu ta interesa pa siña un tiki mas tocante salud mental ta bon bini. 

Sr. Jeroen Van Geest di PAAZ a hiba palabra y a splica un tiki mas tocante e conferencia cu ta bay tuma luga dia 22 di october. Sumamente contento di por bisa cu ta prome biaha cu departamento di PAAZ lo presenta un conferencia asina pa e pueblo di Aruba. Algo cu sigur ta necesario mirando e demanda halto cu tin pa ricibi informacion tocante Salud Mental. 

Durante e conferencia di prensa tambe a hiba palabra algun di e oradornan cu lo bay presenta dia 22 di october durante e Mental Health Awareness conference. Sra. Misha Raymond, psychiater cu ta labora na Kinder en Jeugd psychiatrie a splica cu durante e conferencia e lo presenta e topico di e causa di suicidio den teeners y young adults, kico ta e señalnan, kico lo ta e stap nan cu lo mester tuma. Tambe a hiba palabra Sra. Cassandara Labasti cu ta traha como enfermera na PAAZ cu lo bay splica con e ta pa un cliente wordo tuma cerca PAAZ y e rol importante cu e famia tin pa cu e recuperacion. Sra. Jesselyne Winklaar cu ta un woonbegeleider FCCA, tambe a tuma palabra unda e la splica FCCA su rol pa acomoda clientenan cu tin un tipo di deficiencia mental pero cu por biba riba nan mes. Y pa ultimo Mr. Tony Cox di Butterfly Farm a splica un poco con nan ta yudando cu e proceso di rehabilitacion y integracion bek den comunidad. 

Un biaha mas di parti di PAAZ hunto cu Jordan Ling Foundation kier a invita pueblo completo pa acudi na e Mental Health Awareness conference dia 22 di october 2016. Keda pendiente paso pronto lo lansa e Facebook Page na unda lo bay por mira e programa y kico tur ta bay tin e dia aki.