Raad van Advies cu conseho negativo riba presupuesto 2017

ORANJESTAD -  Mientras cu e presupuesto di pais Aruba a keda entrega na tempo siman pasa na Parlamento, su contenido no ta conta cu aprobacion di e organo consultativo Raad van Advies, y nan a conseha Gobernador pa no presenta esaki na Parlamento, tanten e cambionan sugeri no wordo implementa. Y manera custumber, RvA ta motiva nan pensamento den un carta pa Gobernador di Aruba luna pasa. E siman aki e rapport di RvA a bira publico despues cu ela keda entrega na Parlamento. 

Entre e problemanan di gobierno, RvA ta señala hopi biaha cu tin falta di splicacion, motivacion y ta carece di informacion, cu ta haci dificil pa RvA na varios instante, por duna un conseho corecto y completo. Entre e puntonan cardinal, RvA ta señala cu e presupuesto falta un pronostico di likides, bista di gasto y entrada y di e garantianan cu tin, y finalmente un bista di e gastonan di e ministerionan cu ta forma parti di e sector colectivo. Mientras cu e norma di deficit permisibel pa 2017 ta poni na 0.5%, RvA no ta kere cu gobierno lo logra esaki. Gastonan a aumenta cu 47 miyon, y ta debi na aumento na pagonan na AZV, bonus pa APFA, interes acumula y proyectonan PPP. 

Fuera di esey, ta mira cu e gastonan pa personal ta sigui aumenta, mientras cu no ta bahando gasto. Un problema cu gobierno di Aruba ta haya constantemente ta cu nan ta presenta un plachi mucho optimista, siendo cu e situacion no ta asina. A base di esey, nan ta mustra pues cu e deficit lo ta mas halto cu e norma stipula. Y esaki ta viola e acuerdo cu tin cu e colegio di supervision financiero CAft. 

Mientras cu tin por lo menos 7 medida pa controla gasto y aumenta entrada, esakinan no ta wordo aplica segun RvA y no ta mucho cla con esaki ta wordo haci. Ademas segun e organo consultativo, e reforma financiero tabatin poco efecto riba e reduccion di gasto. Loke a pasa ta cu a logra e norma di deficit no pa maneho structural, sino pa u entradanan mas halto incidental. Ta haci mencion tambe di gastonan halto di e proyectonan PPP, y ta recomenda pa evita di bin cu tipo di proyectonan asina sin mas. Mester remarca cu CAft tabata mas fuerte ainda, indicando cu nan no ta conseha ningun proyecto PPP mas fuera di esnan cu tin aworaki caba. 

E situacion di reapertura di refineria tambe ta dudoso segun RvA. Entre e precupacion, e organo consultativo ta mustra cu nan no ta premira cu e pago di e settlement di Valero y otro entrada genera pa e deal aki lo bay pa 2017. Ta solamente si logra haya fondo extra di p.e. ATA den forma di un surplus, cu e lo por compensa pa e falta di entrada di e deal di refineria, manera cu gobierno a pone riba e presupuesto. Ademas, RvA no ta mira un splicacion mas amplio riba e efecto di e reapertura di e refineria y kico esaki kier men financieramente pa pais Aruba. Mirando tur lo menciona, RvA como tal ta duna un conseho negativo (atrobe) riba e presupuesto y ta conseha su excelencia Gobernador di Aruba pa no pasa e presupuesto pa Parlamento pa tratamento.