Tres taxi central ta distancia di declaracionnan di taxista Orman

ORANJESTAD - Tres taxi central ta distancia nan mes fo'i declaracionnan di Linda Orman. Den un comunicado di e centralnan en cuestion, esta A1taxi service, Diamond y ATC, nan ta sigura cu  'mayoria di taxista na Aruba, cu ta riba 200 cu ta parti di e tres central mas grandi, ta distancia nan mes di e declaracionnan di taxista Linda Orman'. Esaki sin conta e otro 140 taxista independiente.

FALTA DI RESPET

Segun e centralnan menciona, Orman no ta vocero di mayoria centralnan di taxi y taxistanan a bisa cu ta falta di respet pa cada taxista loke e señora aki ta haciendo. "Mi ta kere e ta papiando algo cu no ta na su lugar, e ta pidiendo pa Minister de Meza drecha e tarifanan di taxi. Mi ta kere e ta hopi bruha pasobra Minister Otmar Oduber ta e Minister di Transporte y e ta e persona cu a pidi pa e Centralnan sinta hunto pa drecha e lista di prijs di un manera cu no ta stroba nos haya nos pan" e comunicado ta sigui bisa na nomber di e centralnan menciona. "Ora e propuesta di cambio di prijs lo a keda cla, nos lo mester a entreg'e na Minister Oduber, pero awo bo ta habri corant y bo ta wak Sra. Orman ta papia den nomber di e taxinan y ta duna nan mal informacion. Nos como taxi centralnan A1taxi service, Diamond y ATC ta distancia nos mes di e señora aki. Nos miembronan ta fada di e manera cu e señora aki ta actuando y ta treciendo desunion den e taxinan. A yega tempo pa e señora stop di papia den nos nomber y gaña e taxinan mientras cu e ta bisa cu e ta vocero di taxi" e comunicado a sigui bisa. "Señora Orman, absolutamente bo no ta vocero di taxi, bo ta vocero di bo mes, papia den bo nomber no papia den nos nomber, e cos aki  ta hopi fastioso" e ta sigui bisa. Segun e centralnan, ta parce cu e señora ta hungando politica, e ta haciendo todo por todo pa bringa e minister di Transporte, siendo cu e propio Minister Oduber a reuni cu e centralnan mencioan dos siman pasa aclareando tur duda y contestando tur pregunta. "Anto esaki ta e reunion cu e mesun señora Orman a bisa cu e no ta bay y practicamente a conseha pa taxistanan no bay. Un biaha mas señora Orman no ta vocero di taxistanan" e comunicado a sigui bisa.