Caso ABC-Azure: Proteccion di naturalesa vs desaroyo economico

ORANJESTAD - Aki dos siman ta bira conoci si e proyecto den pleno construccion conoci como Azure Condominiums por continua of,- segun demanda di Aruba Birdlife Conservation (ABC) -, tin cu wordo para y 'desmantela' completamente. E caso a tuma lugar recientemente den corte, cu a resulta den un debate largo entre abogadonan cu a dura por lo menos 5 ora unda abogadonan a debati otro fuertemente. Den wega ta e.o. e siguridad cu inversionistanan por tin ora di inverti placa na Aruba den proyecto versus e proteccion di areanan di naturalesa di nos isla manera determina pa un plan di maneho teritorial (ROP). ABC a gana varios caso caba riba e tereno aki, pero aki tin cu wak si aki nan ta logra un victoria mas riba nan nomber. Cu un hues diferente di e casonan anterior, e ta bira un situacion interesante cu por bay cualkier direccion. 

ABC

ABC cu ta esun cu a entama e caso, ta alega cu e compania en cuestion, esta PGM Condobuilders NV, a rechasa nan peticion pa para e proyecto y cu nan ta construyendo contra regla y ley, y como tal mester para tur construccion y laga e tereno den e estado cu nan a hay'e. Nan (ABC) ta referi na e carta manda mas prome e aña aki (april 2016) unda cu ta haci e peticion pa para e proyecto. Mes momento ABC ta desmenti alegacion di e contra partido cu nan tabata na altura di e proyecto for di 2014 y cu e tempo ey nan no a reacciona y of bringa e proyecto. Berdad cu a toca e tema e tempo ey, pero segun e abogado Geert Rep, ningun momento a informa ABC di e plannan concreto di e construccion. Un persona a simplemente haci pregunta riba e aspecto ambiental na e presidente di ABC esta Greg Peterson, cu a contesta tur esaki. PGM segun ABC, ta violando e ROP (segun pagina 64 di e ROP) y gobierno di su banda, ta sconde tras di e pensamento cu 'e tereno cu ta den disputa no ta uno 'berde', y cu contrario na pensamento di ABC, e ROP por wordo adapta (cu gobierno ta haciendo actualmente). Abogado pa ABC a persisti cu basa riba propio declaracion di abogado di gobierno den pasado, e ROP ta mara gobierno na e maneho. E hecho cu tin un permiso di construccion, no ta stroba ABC di persisti riba nan demanda, segun e abogado a alega durante e caso. E peticion final tabata pa e construccion para, desmantela e structura cu tin caba, kita e grua grandi for di e sitio. 

PGM 

E defensa di e contra partido PGM a purba desbarata e ponencia di ABC, y convence hues cu e loke ta e demanda di ABC, ta absurdo y un hilaridad. E base di e defensa di PGM ta e.o. si tin e siguransa pa esnan cu kier inverti na Aruba. Algo cu aworaki no ta e caso si hues dicta na fabor di ABC. Abogado pa PGM, Rudi Oomen a mustra cu pa cuminsa, e tereno den disputa a wordo ofreci na PGM pa e propio gobierno (lesa minister Benny Sevinger:red) for di aña 2013, pues no ta nan a buske sino a hay'e ofreci. Despues cu a cumpli cu tur rekisito, proceso cu a dura dos aña, a firma pa e tereno pasa riba nomber di e compania. E alegacion di PGM ta, cu e contra partido (ABC) tabata debidamente na altura di e proyecto, y asambiendas di esey no a protesta ningun momento. A indica te hasta cu presidente di ABC 'no tabatin ningun problema' cu e proyecto. De hecho, ABC asabiendas di e proyecto, nunca a protesta legalmente contra ni uza e medionan legal pa haci tal. Ni na 2016 cu ainda esaki tabata por, esey no a tuma lugar. PMG ta alega cu diripiente na 2016 nan ta ricibi un carta di ABC cu e demandanan cu PGM a considera un hilaridad y inicialmente hasta a consider'e como un 'mal joke'. A mustra riba e aspecto financiero y e consecuencia cu un eventual paro di e proyecto por tin pa e compania y e proyecto completo. E cuadro mas severo presenta pa e abogado,  ta bancarota di e compania (si para e proyecto, esnan cu a cumpra caba y inverti kier nan placa bek), y un skelet para meymey di un area turistico (e edificio ta conoce varios piso caba), cu sigur no ta beneficia e isla, su turismo y e economia. Cu mas di 12 miyon dollar inverti den e proyecto, PGM a alega cu nan ta na un 'point of no return' esta cu dificilmente nan por bay bek. E structura ta asina leu cu ta dificil pa para esaki, y pero aun, desmantela esaki. De hecho, ta alega cu desmantelacion ta practicamente imposibel mirando cu e structura ta asina fuerte hinca den tera, cu e lo crea mas daño si deshaci di esaki. De hecho, no por pone e tereno bek mas den e forma cu a hay'e, creando aun mas problema pa hasta ABC, ya cu e ta haci e naturalesa mas daño si nan haci loke ABC kier, y ta contra e meta di ABC esta conserva naturalesa. Abogadonan a purba na ridiculisa e intento di ABC pa loke ta e midimento di tereno, particularmente e metodonan uza pa demonstra nan punto. Segun PGM, e metodonan usa pa ABC no ta sirbi y no por bay riba algo asina te pa considera e midimento y resultado di esaki como actual y pio ainda, preciso. E hecho cu tin un permiso di construccion, ta demonstra segun PGM cu nan a cumpli cu tur rekisito pasobra no ta asina asina ta duna un permiso asina. Y de hecho, si kier bringa e legalidad di e permiso aki, e caso aki no ta esun pa bring'e. Y finalmente, si kier bringa otorgamento di e tereno erfpacht, nan ta na adres robes, pasobra pa esaki, mester bringa gobierno cu ta esun cu ta otorga esaki. 

GOBIERNO

Gobierno su abogadonan Hagen y Huiskes a debati 5 punto den nan defensa. Mester a bringa prome nan participacion cu a wordo disputa pa ABC. Finalmente nan a participa toch den e caso. E puntonan basico di argumento tabata entre otro, cu ABC no a uza e proceso legal pa protesta esaki (bezwaar). Tambe e alegacion di ABC cu e tereno en cuestion ta un 'berde', segun gobierno no ta berdad. Ademas e ROP (Ruimtelijk Ontwikkelings Plan) no ta uno cu ta mara gobierno y prohibi'e di cambia esaki. Y si de paso, e ROP ta 'bindend', asina mes e ta duna gobierno espacio pa 'desvia'. Y finalmente, gobierno a otorga e tereno erfpacht den un forma corecto, pues no tin nada ilegal cu esaki y como tal ABC no por reclama cu e ta un otorgamento no corecto pues no por declara e otorgamento como 'nulo'. Un punto interesante ta e hecho cu ABC, segun gobierno, ta kere cu e caso aki ta mes facil cu e otro casonan cu nan a gana den pasado. A haci te hasta mofa cu e letternan ABC, uzando un cancion di e artista fayecido Michael Jackson, ABC, y cu e compania cu tin e mesun letternan den abreviacion, ta kere cu e caso aki ta mes facil cu 'A-B-C'. E caso aki tabata pues uno pisa, largo y dificil, segun propio argumento di e abogadonan. Hues lo delibera riba e defensanan respectivo, y dicta su sentencia dia 21 di september den oranan di mainta.