Sevinger lo contesta pregunta riba tereno diabierna den Parlamento

ORANJESTAD - E reunion publico di Parlamento riba tereno, ta sigui diabierna awor unda cu minister di infrastructura Benny Sevinger mester duna contesta na e preguntanan haci den curso di dialuna. E reunion tabatin su retonan pa cuminsa, pero unabes cu esaki a inicia, ela sigui su marcha te atardi. Pa atardi presidente di Parlamento Marisol Lopez Tromp a suspende esaki te diabierna awor 1:30pm pa asina duna e mandatario invita e chens pa contesta tur pregunta. E reunion por cierto, tabata pidi pa fraccion di MEP. 

MOTIBO DI E REUNION

Segun lider di fraccion di MEP Evelyn Wever Croes, e intencion tabata pa mira e berdad bin riba mesa riba e asunto di repartimento di tereno. "Awe nos ta bay mira cu prueba den man, con e minister aki a regala tereno di pueblo, con el a haci negoshi bou di mesa, previligiando hendenan serca di dje cu miyones y miyones mientras cu ta laga ciudadanonan mes warda" Wever a bisa. A mustra cu 11 mil ciudadanonan ta wardando tereno, pero no por haya tereno. E mandatario no ta dunando tereno, ni pa vivienda social. "Awe ta bay bin riba mesa e berdad di e negoshi di tereno cu tin na Aruba" Wever a sigui bisa. E ta mustra su preocupacion. E otro tema cu MEP kier a check cu e mandatario, ta e maneho cu tin ad hoc pa destrui naturalesa. Segun Wever, e mandatario en cuestion ta haciendo esey structuralmente y esey ta e otro punto di agenda. Como tal, e fraccion su intencion ta pa confronta e mandatario cu e pruebanan cu nan tin, y pa e minister responsabilisa su mes pa esaki. Si e no por, anto lo por pidi un mocion di desconfiansa p'e, of laga Parlamento investiga loke ta pasando na Aruba, como un di e posibel medidanan.