Gobierno y parlamentario no sa di ferry Venezolano

ORANJESTAD - E ferry anuncia recientemente cu lo mester cuminsa opera entre Aruba y Venezuela fin di october, no ta e mesun proyecto di ferry cu e tres islanan ABC y Hulanda ta purbando pa concretisa. Asina un di e personanan cu ta carga e proyecto, esta parlamentario Andin Bikker a confirma na NoticiaCla.com. Mas fuerte ainda, gobierno no ta na altura di e proyecto aki. Por lo menos no 'publicamente', pasobra priva, e portal aki a compronde cu gobierno lo a topa cu e grupo aki prome cu fin di siman na bestuurskantoor. Publicamente nan ta desmenti algo.  

REACCION DI GOBIERNO

Prome minister Mike Eman, minister Benny Sevinger y minister Otmar Oduber den nan reaccion na e portal aki a desmenti di sa algo di e proyecto. "Mi no sa nada di e proyecto ey" Eman a sigura NoticiaCla.com dialuna mainta. Sevinger tambe a desmenti y a manda nos check cu colega Oduber cu ta esun encarga cu transporte. Pero ora cu a tuma contacto cu e mandatario, su reaccion tambe tabata den mesun direccion "Ministerio di transporte y/of turismo no tin ningun info di e supuesto ferry. Esaki no ta un proyecto di minister of ATA!" Oduber. Den otro medionan minister di husticia Arthur Dowers tambe a mustra di no sa nada. Esey ta nifica cu tin un proyecto cu ta bay cuminsa, cu por tin un embergadura grandi pa e fluho entre Aruba y Venezuela, sin cu gobierno ta 'oficialmente' na altura di dje. Si esey ta un problema no ta conoci. 

BIKKER

"No, esey no ta e ferry cu parlamentonan di Aruba, Corsou y Bonaire y Hulanda tabata traha ariba dje desde 2014 bin ariba" Bikker a sigura e portal aki. Di loke el a compronde ta trata di un iniciativa di gobierno di Venezuela cu un grupo priva cu tin deseo pa genera divisa pa Venezuela door di habri e turismo eynan. E parlamentario sinembargo ta mustra cu tin hopi precupacion pa cu e ruta eynan. "Parlamento di Aruba, Corsou y Hulanda di aña 2012 bin ariba, tin palabracionan haci na St Maarten pa un proyecto di ferry specificamente Aruba, Corsou y Bonaire, y e dimencion di Venezuela no ta inclui den dje" Bikker a bisa. Pero mes momento e ta mustra cu no por haci nada si sector priva y hasta gobierno Venezuela ta bezig cu un proyecto asina. E ta mustra cu di Aruba no tin hopi sosten debi na e situacion specifico di Venezuela. "E dilema cu e gobierno di Aruba ta hay'e den dje ta cu si gobierno di Venezuela ta bezig cu un grupo priva cu e ferry akinan, y gobierno di Aruba a bay Venezuela pa firma pa reapertura di e refineria, si e propio gobierno Venezolano haci un apelacion pa e ferry aki". Bikker ta mustra cu e por bira cu Venezuela ta cuminsa reclama fabornan bek pa a yuda cu e firmamento pa e reapertura di e refineria.