'Jeon' ta lanza 'Hend’i Mondi' reflehando un parti di su bida como hoben

ORANJESTAD - Jonathan Thiel, miho conoci como “Jeon”, ta un talentoso artista, compositor, areglista y cantante hoben, cu a revoluciona musica moderno combina cu toke tipico y na Papiamento. 

Durante fin di siman tras di lomba, “Jeon” tabata artista invita na e famoso y exitoso Curaçao North Sea Jazz Festival 2016. “Jeon” a haya e oportunidad di oro, unda cu mas di 10 mil bishitante a presencia su presentacion diabierna anochi. Desde e momento cu “Jeon” a invita e legendario di musica, Claudius Phillips, pa join e riba escenario, nan a pone ambiente y por a sinti un aceptacion inmediato di e publico. Di tur banda e bishitantenan a cuminsa bin y asina disfruta di e presentacion di “Jeon” y Claudius Phillips. E presentacion a conoce un angulo diferente y ela yega un climax total, na momento cu “Jeon” a baha y drenta den e publico y asina mobilisa un cantidad grandi di bishitante, cu su cancionnan. E reaccion di e publico simpelmente a capta atencion di e organisadornan y a keda comproba cu “Jeon” sa kico e ta haci, ora e ta riba escenario. 

Pero net prome cu tur e hype di CNSJ, “Jeon” tabata druk tambe cu su ultimo produccion musical “Hend’i Mondi”, cu sigur lo ta un otro exito. E cantica ‘Hend’i Mondi’ ta un composicion unico den su contenido, combina cu un ritmo diferente. E video clip a tuma hopi dedicacion y a percura pa tur e detayenan resalta den tur su contenido. Director di video tabata na encargo di Guillermo Bohorquez y como productor di video, Edward Silberie tabata na encargo hunto cu su asistente, Nicolas Amundaray. 

Diaranson 7 di september, “Jeon” ta invita tur su fiel fanaticonan como tambe henter pueblo di Aruba, pa bay riba JeonVevo riba Youtube y asina disfruta di su ultimo produccion. “Hend’i Mondi” ta un combinacion di e gran exito “Dushi Bida”, pero enfocando mas riba e parti cultural, social y tipico, reflehando parti di historia di bida di “Jeon” como hoben y tambe nos hendenan di Santa Cruz y Noord. No por keda sin menciona y gradici sra. Glory Tromp y famia, pa permiti henter e team haci uzo di nan cunucu y disfruta di un delicioso sopi tipico, como tambe e compania di video SkyFallFilms y Krish Mahtani. Sin boso confianza y colaboracion, “Hend’i Mondi” no tabata realisabel.