Sjiem Fat: Accion abogadonan riba asunto di piket ta sigui

ORANJESTAD - E accion di abogadonan riba e asunto di piket (core warda) ta continua. Asina deken di orden di abogado Johan Sjiem Fat a confirma dialuna mainta na NoticiaCla.com. E abogado ta confirma cu a haya un invitacion di minister Arthur Dowers (Husticia) pa dialoga riba e asunto. "E no por duna ningun toezegging ainda. Pa e motibo ey, e accion anuncia ta sigui" Sjiem Fat a sigui bisa. 

INVITACION MINISTER

Despues cu e orden di abogado a anuncia nan accion (di no traha como abogado liber den piket cuminsando dia 7 di september te 16 di september), nan a wordo invita pa dialoga riba e problema. "E ta compronde nos situacion y ta dispuesto pa pensa riba un solucion, pero mester consehonan di su ambtenaarnan y pa e aña 2016 presupuesto no tin espacio. E no por duna niun concrete toezegging ainda" Sjiem Fat a bisa. Y como tal, e accion ta continua. Pa loke ta e dialogo cu minister, esaki lo tuma lugar diaranson awor entre e minister y un delegacion di orden di abogado. 

E ACCION 

Abogadonan cu ta core warda, no ta bay haci esaki entre 7 y 16 di september. E anuncio ey a bin siman pasa manera cu NoticiaCla.com a relata caba. Nan ta nenga di fungi como abogado di warda como cu nan no a haya contesta di gobierno riba e tema aki di aumento di honorario di 900 florin pa 1800 florin. "Nos ta lamenta cu minister di husticia no a duna e atencion necesario pa resolve e asunto aki, no obstante e comision special (Commissie Toevoeging in Strafzaken) tambe a sostene e peticion di e abogadonan aki" presidente di orden di abogado Johan Sjiem Fat a anuncia den un carta dirigi na minister di husticia Arthur Dowers siman pasa.