Lenny Kravitz a seya e anochi final di CNSJF 2016

WILLEMSTAD - Mientras cu Michael Bolton y Lenny Kravitz a hala e publico di mas grandi di e anochi, tur e artistanan di diasabra anochi a haci 'nan' cos cu ta pone cu henter e anochi tabata uno perfecto, manera cu bishitantenan di CNSJF ta custumbra di dje; un cantidad di artista di calidad pisa riba un solo anochi! Pero cu Lenny Kravitz tabata e strea di anochi, pa mayoria tabata un hecho. For di Ilan Chester cu a te hasta dedica un piesa na Claudius Phillips di Aruba, te na Michael Bolton unda sala Celia a resulta demasiado chikito, te na J Balvin cu a pone su saus Colombiano, y finalisa pa un Lenny Kravitz cu a considera su publico na final como un famia, pidiendo e publico pa canta happy birthday pa su amiga, conocido artista Salma Hayek. Y pa no lubida Snark Puppy, Anthony Hamilton y Charlie Wilson.

ILAN CHESTER 

Ilan Chester cu tabata un artista di ultimo ora pa reemplasa otro grandi Burt Bacharach, a percura pa un sala Celia completamente yen, y su experiencia di 30 aña den musica, a keda demonstra. Su dominio riba e piano, su bos cu ta keda mes fuerte cu antes, a duna esnan den sala e confiansa y alegria necesario pa gosa henter su presentacion. Sinembargo, tabata obvio cu esnan cu a bin, e fansnan real di Ilan Chester, tabata kier UN cos: Cerro El Avila!! Constantemente nan tabata los grito pa Chester presenta su hit comercial mas grandi di su carera. "E ta bin, mi ta cera cu ne" Chester a sigura un y tur. Loke pa hopi local tabata un momento di emocion, ta ora cu Chester dado momento a dedica un di su baladanan na 'el estrea de Aruba y Curacao'. "Boso conoce Claudius, e strea di Aruba y Curacao? Nunca mi tabata sa cu e cancion aki lo tabata inspiracion pa un artista su carera" Chester a bisa, refiriendo na Claudius Phillips cu ta considera Ilan Chester como su inspiracion pa participa den festival di OTI, cantando Spaño. Chester y Philips a topa anteriormente, cumpliendo cu e peticion di e artista Arubiano di kier topa su idolo. Y manera priminti, na final Chester a pone henter e sala Celia biba, bula y canta cu "Cerro El Avila". 

J BALVIN

E cantante Colombiano di reggeaton J Balvin for di prome tononan cu a sa di captura su audiencia cu su hitnan un tras di otro. Un di e artistanan di e festival cu mester a atrae e  grupo di hoben, no a defrauda. "Mi ta un cantante Colombiano y orguyoso di tal" Balvin a 'informa' su publico for di comienso di su presentacion. Un tras di otro, su exitonan tabata sali y cu cada cancion, e publico tabata drenta e ambiente mas y mas. Sigur organisadornan a logra nan meta cu J Balvin e anochi ey. 

MICHAEL BOLTON

Loke a resulta un 'sorpresa' grandi tabata Michael Bolton. For di comentarionan inicial, e atencion pa Michael Bolton tabata relativamente 'abou', pero pa sorpresa di hopi, e sala unda cu Bolton a presenta, esta sala Celia, a resulta demasiado chikito pa e presentacion. Mientras cu Ilan Chester a yena Celia completo, Bolton a colma e sala di hende, unda cu seguridad dado momento a bira nervioso mirando cuanto hende tabata presente. Realmente no tabatin caminda di pone hende, y dado momento e sala considera como e 'refugio pasobra e tin airco', tabata mescos cu un sala pafo, sin biento. Seguridad a cuminsa asisti hende pa sali pafo debi na e cantidad grandi di hende, y otronan mester a tuma e gusto di para wak (na gran cantidad) pafo di Celia riba e pantaya central. E presentacion di Bolton tabata Bolton. Un persona cu siguransa di su baladanan romantico, unda cu cada balada tabata pone e publico canta hunto na bos halto. Sigur un di e exitonan grandi di e anochi. 

SNARKY PUPPY

Pa motibo di e schedule simultaneo, NoticiaCla.com no a logra presencia e grupo Snarky Puppy, aunke di comentarionan, e fanaticonan real no a keda nada defrauda. Fanatico periodista di Corsou Jeroen Jansen a relata riba su pagina di FACEBOOK, cu 'despues di Snarky Puppy mi tabatin e necesidad y gana di brasa tur hende, dus mi a bay cas lihe! Emocionan inexplicabel. Musica ta magia" Jansen a bisa. Un otro a pone, "Tin biaha si bo tin suerte bo ta logra scucha musica cu ta increiblemente bon y sensasional. Esey a sosode atrobe na CNSJF, danki Snarky Puppy". Y asina mucho mas amantenan di e grupo aki, a expresa nan mes totalmente satisfecho di e presentacion di e grupo aki. 

LENNY KRAVITZ

Pa hopi fanatico, si no ta tur, ta nan prome biaha cu nan por a experiencia Kravitz den concierto. Y pa Kravitz, esaki tabata tambe su prome encuentro cu Corsou. Y manera un berdadero artista, Kravitz a sa di cende e mecha di alegria cu su cancionnan. Un tras di otro nan tabata sali. Y ora bo kere bo a tende e miho, e tabata sorpende cu mas. Loke hopi a aprecia, tabata e hecho cu e tabata envolvi e publico completo, y tambe su banda. Cada miembro e tabata duna su atencion y pone luci riba escenario. Por a nota cu Kravitz a converti su publico den un famia grandi. Ora cu el a baha y drenta den e publico, tur hende a confirma cu Kravitz ta hende di tur hende. Na final, Kravitz a pidi e publico un fabor. "Mi ta considera boso mi famia toch?" Kravitz a bisa su publico. "Awel, mi mester un fabor. Mi amiga (artista Salma Hayek) a haci aña y mi no por tabata presente. Boso por canta happy birthday p'e den boso estilo?" El a pone miles di hende canta happy birthday pa Hayek e ora ey. Ora cu Kravitz a caba, ela bin bek mas duro, y duna su ultimo gota cu e tabatin, cu un boem, di dos cancion tras di otro, cu a resulta den e climax di e anochi. Un fanatico full dilanti, completo cu t-shirt di Kravitz su presentacion na Hulanda na 1991, tabata den su elemento, y a splica cu el a disfruta inmensamente! "E miho di e festival! Definitivamente!" e persona aki a bisa. "Despues di 18 aña, finalmente mi a mira Lenny Kravitz! E highlight di e festival CNSJF e aña aki!" un otro fanatico a declara. Hunto cu Prince, e miho presentacion den 7 aña di CNSJF. Punto!" un fanatico cu a bay tur 7 aña, a declara di e presentacion di Kravitz. Pa motibo di conflicto di orario, NoticiaCla no por a presencia Charlie Wilson ni Anthony Hamilton tampoco, pero a compronde cu nan tambe a luci grandemente.

EXITO

Organisadornan a keda sumamente contento cu e resultado di e di dos anochi, y a considera Lenny Kravitz tambe como un artista 'bestial!" Pero asina mes, a bisa cu tur artista tabata excelente y super bon", un di e miembronan di fundacion Bon Intencion a confirma na NoticiaCla.com. Na tur, otro exitoso edicion di e CNSJF. Organisadornan, en particular Gregory Elias y su fundacion Bon Intencion, por mira atras riba otro evento spectacular y exitoso.