Jeon a sigui score cu su presentacion na Corsou na CNSJ

WILLEMSTAD - E artista di Aruba Jonathan "Jeon" Thiel a sigui causa sensacion na Corsou den e Curacao North Sea Jazz Festival 2016. Aunke e no tabata un di a artistanan cu por a presenta riba un di e tres escenarionan oficial grandi, e ubicacion di Jeon su 'stage' tabata magistral, unda cu practicamente tur e 12 mil bishitantenan diahuebs y e algo mas di 8 pa 9 mil diabierna nochi, mester a pasa y keda wak su presentacion. Diabierna anochi, a bira un momento historico ora cu Jeon a yama e maestro Claudius Phillips riba escenario. Hunto nan a Jam un rato, pa gran alegria di e publico. Pero loke a hala atencion ta ora cu Jeon a drenta den e publico y mobilisa e cantidad grandi cu un di e temanan cayente. E video cu NoticiaCla.com a graba e.o. a bai viral riba rednan social mesora. Definitivamente Jeon a demonstra cu e merece mas cu e stage cu e tin na Corsou, y cu promotornan mester cuminsa pensa pa haci algo mas cu ne proximo biaha. Un exito sigur pa Jeon y un danki na organisadornan di CNSJ pa a contrat'e pa e fin di siman aki. Notabel tabata e orguyo cu tur e Arubianonan cu tabata presente, a sinti ora cu nan a mira e publico inmenso reacciona riba e presentacion di Jeon!