Chris Brown a presenta pero a desapunta na CNSJ 2016

WILLEMSTAD - E prome anochi oficial di Curacao North Sea Jazz 2016, a pertenece na Betty Wright, Jamie Cullum, Tom Jones y Level 42. Chris Brown aunke tabata poni pa cera e anochi pa su taya di artista, no a logra e impacto cu a spera di dje. De hecho, hopi a papia di un desapunto total. Wright, cu a reemplaa Melody Gardot a haci un cos den e Celia Room, y a laga hopi hende pidi pa mas. The Cuban Affair aunke poderoso no a capta e audiencia inicial pero si a demonstra clase di e musica tipico Cubano. Jamie Cullum tabata grandi y a laga esnan presente cu gana di mas. Level 42 tabata e faborito pa e.o. e homber di e festival, organisador Gregory Elias. El a tuma tempo pa personalmente presenta e presentacion na Sir Duke Stage y goza di Level 42, aplaudiendo tur nan cancionan. Tom Jones na su turno a duna su show di clase, aunke hopi ta haya cu e show tabata mas apropia pa un Celia Room. 

CHRIS BROWN

Chris Brown, e artista pa cera e anochi, a laga basta di desea, ora cu a bira conoci e.o. cu e tabata canta cu 'pista' y otronan te hasta a kere cu e tabata 'dobla' esta, no canta di berdad. Y pa e placa, dobla a wordo considera como un move no corecto. E tabatin su seguidornan sigur, mayoria damitanan hoben cu tabata ansha pa su prestacion e anochi aki. Otro fanaticonan no a keda nada contento cu e presentacion, indicando cu e tabata 'dobla', y cu su repertorio tabata grandemente basa riba su cancionan 'nobo'. E consensus pues tabata cu Brown tabata mas un hype cu otro cos. Di otro banda, tin e pensamento cu por lo menos Brown a presenta, considerando e situacion cu e ta(bata) aden. "Pa e mesun cos su management por a cancela y causa mas problema pa e organisadornan", tabata otro comentario cu a domina. 

CHRIS BROWN HYPE

Pues e  anochi sigur tabata marca pa e hype rond di Chris Brown, pa e.o. su envolvimento cu husticia algun dia prome. Deteni, laga liber cu fiansa, tabatin duda ainda cu Brown lo a aparece na Corsou. Esey so caba, a duna e anochi y sigur prensa y organisadornan mas motibo pa ta presente y wak 'kico ta pasa'. Pero ya diahuebs anochi NoticiaCla.com a haya tende di e organisadornan cu Brown tabata na Corsou y cu e lo presenta. Prome cu su presentacion, por a nota mas seguridad cu normal, y tambe mas prensa cu normal. Tur pa mira 'kico' y 'con' Brown lo a actua mirando e situacion cu e ta(bata) aden recientemente. Pero, Brown, aunke a hiba palabra, no a toca e tema (logicamente) di su ultimo enlase cu husticia Mericano, sino a mustra claramente cu el a bin Corsou pa pasa bon y duna un concierto pa su fansnan. Keda pendiente pa e bista fotografico di e di dos anochi di e festival.