Unit managers di EPI ta reanuda trabou aceptando condicionnan original di Minister

ORANJESTAD - Diabierna dia 2 di september despues di merdia SIMAR y unit managers di EPI, por medio di nan abogadonan, a notifica gobierno cu nan ta bay di acuerdo cu e ultimo proposicion manda na nan pa por reanuda trabou. Ta trata aki di e mesun condicionnan cu ya a wordo ofreci na nan durante e deliberacionnan prome cu e caso sumario. Hues a dicidi diaranson ultimo pa schors e sentencia y pa duna espacio pa e dos partidonan sigui delibera riba e condicionnan. 

Di inicio di e deliberacionnan Gobierno a presenta un solucion factible na SIMAR y Unit Managers otorgando entre otro taakuren addicional pa cada unit pa por wordo aloca na docentenan cu por haci cierto trabounan den e unidadnan cu tin 2 Managers te ora bin claridad riba e structura di e school. 

Awe e unit managers y SIMAR a haya nan mes ta acepta esaki pa asina nan reanuda trabou na school. E unit managers lo mester reanuda nan trabou bek per direct unda cu nan lo mester sigui traha riba e formatie y rooster cu a wordo produci cu sosten di Dienst Inspectie y tambe lo mester bai traha cu urgencia riba e casonan di intern beroep y examencommissie pa asina no mester sigui perhudica e studiantenan aki den nan estudio. Tur esaki bou di guia y instruccion di directie di EPI cu tin e maneho y autoridad na e dicho school.

Minister di Enseñansa, Dienst Publieke Scholen y Directie EPI ta spera cu por conta cu cooperacion di tur Unit Manager cu a acepta e condicionnan aki y pa hunto traha na drecha e situacion crea durante e ultimo 2 simannan na Colegio EPI, na bienestar di studiantenan y docentenan.