Simar: Welga di Unit Managernan EPI ta sigui awe

ORANJESTAD - Welga di Unit Managernan di EPI ta sigui awe mainta. Asina sindicato SIMAR a informa NoticiaCla.com diabierna mainta. Manera por corda, diaranson corte a trata caso sumario di Minister Hooyboer contra SIMAR y e managernan, cu meta pa manda nan reanuda trabou. "Esaki no a logra y te cu awe mainta ainda managernan ta den welga" Simar ta bisa. Segun e sindicato, desde diaranson cu hues a manda minister tuma desicion riba e ultimo proposicion di SIMAR, partidonan ta negociando riba un convenio. "SIMAR ta den espera di reaccion di Minister y ta spera cu lo yega na un areglo awe ya cu e empleadonan ta desea di reanuda trabou". SIMAR ta di opinion cu e ultimo propisicion haci ta esun corecto y no tin motibo mas pa cambio ni adaptacion.

E CASO 

Manera cu NoticiaCla.com a raporta anteriormente, sindicato SIMAR y Gobierno tabatin te diahuebs merdia pa yega na otro, sino hues lo a dicta un sentencia otro siman. Esey tabata resultado di e caso sumario diaranson merdia entre gobierno y SIMAR. Gobierno a hiba SIMAR corte pa forsa e Unit Managernan pa reanuda trabou despues di  a welga pa 2 siman caba. Na final di e caso, hues a suspende e caso y a haci su proposicion ya relata. SIMAR a bay di acuerdo cu e proposicion tambe. 

SIMAR

Durante e caso, SIMAR a trece dilanti cu no tin sentido pa papia riba taakuren pasobra e 'bevoegdheden' ta los di otro. Riba esey Gobierno a bisa cu si esey ta e problema, cu por bay di acuerdo cu e 'bevoegdheden' contal cu nan haya un lista cu trabounan pa aprobacion, loke no a wordo manda. 

HUES

Hues a puntra SIMAR pakico a dicidi di welga tur labor y si no ta miho si e unit managernan traha aunke ta parcial. Aki a sigui un debate entre nan (SIMAR). Aki Gobierno a bay cerca Hues y tende cu SIMAR kier tur cos den un PV y cu nan lo ta dispuesto pa entre otro, duna e lista den un siman pa minister aproba dentro di un siman. Tambe cu durante e dos simannan aki, nan lo haci parti di e trabou, despues di e aprobacion completo. E parti di e trabou cu nan ta referi na dje, lo ta trabounan di formacion, cu ta inclui e rooster. Aki gobierno a mustra cu dificilmente por bay di acuerdo sin sa cuanto ora e unitmanagernan lo traha. Huez a schors e tratamento y ta keda pendiente pa partidonan haya otro prome, sino tin un sentencia otro siman.