Caso ABC contra Azure Condominiums ta sigui diabierna

ORANJESTAD - E caso cu a keda 'gewraakt' siman pasa, entre Aruba Birdlife Conservation y desaroyadonan di Azure Condominiums, esta PGM Condo builders ta continua diabierna mainta. Despues cu e abogado di PGM, Rudi Oomen a 'wraak' e hues, esta pone cu e hues mester a keda reemplaza pa motibo di conflicto di interes, e caso ta poni pa sigui pues diabierna. 

E POSPONEMENTO 

Un procedura hopi inusual den corte a tuma lugar siman pasa ora cu un abogado a wraak un hues pa motibo di duda den su imparcialidad den un caso. Ta trata aki di e hues William Winfield cu mester a trata e caso di Aruba Birdlife Conservation contra desaroyadornan di e proyecto di condominio Azure. Abogado pa e desaroyadornan, Rudi Oomen a mustra cu ta considera e hues parcial, debi cu el a 'like' e pagina di ABC y riba dje ta un amante di naturalesa. Como tal, mirando e acto aki, Oomen ta haye suficiente pa pidi pa desafia e hues, y pidi pa un otro hues trata e caso. Despues di un pauza di 15 minuut, Winfield a mustra cu e ta acepta e punto. Esey ta nifica cu un otro hues lo tin cu trata e caso, posiblemente otro siman. 

MOTIVACION DI ABOGADO

Abogado Oomen a splica NoticiaCla.com despues cu e mes no ta riba Facebook pasobra e ta stima su privacidad. Pero ta un otro persona a hala su atencion riba e pagina di e respectivo hues. E hues si ta riba facebook y por deduci cu e ta un amante di naturalesa, y mas specifico pahra, cu ta e topico netamente di e caso di awe mainta. Pa completa e obra, Oomen ta mustra cu e hues a 'like' e pagina di ABC, cu ta crea e impresion cu e ta faborece e grupo aki. Mientras cu esey no necesariamente mester ta e caso, e solo hecho sinembargo cu a 'crea' e impresion, ta suficiente pa desafia e huez den e caso e ora. Y ta esey el a haci. Esey no ta nifica si cu un hues no por tin un pagina riba facebook. "E problema ta cu el a 'like' e pagina, y no e hecho cu e tin un pagina e mes" Oomen a bisa. Abogado pa ABC Geert Rep a admiti cu e ta compronde e situacion y cu si enberdad tin cualkier duda y percepcion cu e hues por ta parcial pa un caso, e ora mester desafia (wraak) e hues. 

REACCION DI HUEZ

"Mi no ta mir'e asina, pero mi ta compronde e asunto y ta acepta e desafio. Mi lo destitui di e caso y lo tin un otro hues pa trata e caso, posiblemente otro siman" Winfield a bisa na final di e caso. 

E CASO MES

Aruba Birdlife Conservation (ABC) mester a topa e desaroyadornan di e proyecto di condominium Azure den corte siman pasa diamars mainta. Manera cu NoticiaCla.com a raporta anteriormente, ABC a entama un caso pa para construccion di e proyecto di condominium Azurre, un proyecto di e desaroyadonan 'PGM Condobuilders'. E ta e tereno bisiña di e proyecto conoci como Blue Residence di condominium tambe y cu ta den construccion actualmente. ABC su intencion ta e.o. pa para esaki inmediatamente. Asina abogado di ABC, esta Geert Rep a confirma na NoticiaCla.com. E caso awor tin cu wordo trata diabierna y cu un hues diferente tambe.