Juan Luis Guerra y Kassav grandi riba anochi gratis CNSJ

WILLEMSTAD - Manera pronostica, World Trade Center tabata colma di hende riba e prome dia di e di 7 edicion di Curaçao North Sea Jazz Festival. Oficialmente esaki ta e anochi 'gratis' unda cu dos grupo of artista ta programa pa presenta y tin cu duna esnan presente e chispa di loke e dianan 'regular', esa paga, ta come y bebe. Y for di e total di 5000 y pico carchi pornada cu a wordo parti, ta spera cu un grupo grandi por dicidi di participa sea e aña aki caba of otro aña na e dianan 'paga'. Tanto Kassav como Juan Luis Guerra ta artistanan cu a ripiti, pero cu esey no a haci e interes di publico menos pa presenta nan diahuebs anochi. 

CANTIDAD DI HENDE

Segun miembro di Fundacion Bon Intencion Sigmund Jansen a confirma na NoticiaCla.com, tabatin riba 12.000 persona cu a presenta e concierto di Kassav y despues Juan Luis Guera. Pa diabierna ta spera entre 8000 pa 9.000 persona cu a paga, y te hasta un poco mas cu esey. "Atrobe e presentacion awe tabata sublime" Jansen a confirma na NoticiaCla.com. Tanto Kassav y Juan Luis Guerra a duna loke tabatin y a deleita esnan presente grandemente. E grupo mas grandi di bishitante tabata di Surnam y un biaha mas Aruba. 

PROBLEMA CU AEROLIÑA

Lamentablemente problema cu aeroliña a pone cu algun destinacion a haya problema pa yega na tempo pa e parti di awe. Jansen a confirma cu tabatin hopi problema cu e buelo di Insel Air for di St Maarten cu a sufri retraso y esnan na aeropuerto no tabata nada contento cu nan lo a perde e prome anochi di concierto. Trinidad tabata menos suerte unda cu aki e buelo completo a keda cancela. For di Aruba tambe tabatin retraso grandi unda cu e prome buelo pa Corsou, cu mester a sali 8'or y mei, a yega Corsou te despues di 12'or pasa. Jansen ta considera e situacion un lastima cu e aeroliña ta confrontando tanto problema ainda, creando un problema consecuentemente pa esnan cu kier goza e festival. 

LINE UP PA DIABIERNA

Pa diabierna, e atencion grandi lo ta riba Chris Brown, pa hopi djies pa wak su prome presentacion despues cu el a haya su mes den problema cu a causa su detencion breve y despues libertad condicional dos dia pasa. Tom Jones y Level 42 tambe ta riba e tarimanan grandi diabierna mientras cu pa loke ta Jazz, Betty Wright cu a reemplaza Melody Gardot y Branford Maralis Quartet lo haci su trabou.