RVA: Minister Oduber a insulta miembro di Conseho Consultativo!

ORANJESTAD  - Cu gran decepcion Conseho Consultativo (Raad van Advies) a tuma nota di  declaracionnan di ministro di Turismo O. Oduber durante tratamento di e concepto di ley pa regula accomodacionnan all inclusive den Parlamento di Aruba dia 24 di augustus ultimo. Asina e organo consultativo a declara den un comunicado diahuebs atardi.  E declaracionnan di cual RvA ta referi na dje den e comunicado, ta encera entre otro cu Sr. Rik Timmer lo ta e representante di AHATA den Conseho Consultativo y cu pa e motibo aki e conseho di Raad riba e concepto di ley menciona lo tabata negativo y na interes di e empresa na unda Sr. Timmer ta traha.

DECLARACIONAN INSULTO

Conseho Consultativo ta considera cu e declaracionnan aki no solamente ta un insulto pa e miembro concerni, pero tambe pa henter e Conseho mirando cu e ta un insulto riba e capacidad, independencia y imparcialidad di tur miembro.

MIEMBRECIA DI CONSEHO CONSULTATIVO

Ser miembro di Conseho Consultativo no ta un funcion full-time y pa tal motibo por spera cu miembronan ta eherce otro funcionnan. Di un banda esaki tin un gran ventaha: e miembronan ta para cu ambos pia den comunidad y no ta duna conseho for di un toren di ivoor. Segun e organo di otro banda e otro funcionnan aki por resulta den un conflicto di interes of por crea e apariencia cu lo por tin un conflicto di interes. Pa e motibo aki Conseho Consultativo tin un set di regla y palabracionnan cla pa contra aresta (e aparencia di) conflicto di interes. Di e forma aki tin un transparencia completo pa locual ta trata e otro funcionnan di e miembronan, mira e website www.rva.aw bou di ‘Raadsleden’. 

PARTICIPACION DI MIEMBRO DI RAAD

Alavez un miembro di Raad no ta participa na reunionnan y decisionnan riba topiconan cu directamente of indirectamente ta tok’e personalmente of na unda e ta envolvi como representante. Un anotacion di esaki ta wordo haci den e notulen di e reunion concerni. Esaki a resulta cu entre otro Sr. Timmer a disculpa su mes y no a participa na e reunionnan riba e concepto di ley menciona y no tabata envolvi den e proceso pa yega na e decision.

PROCESO PA TUMA DESICION

E proceso pa yega na un decision den Raad, segun e organo, ta tuma luga a base di un preparacion y investigacion profundo  y na unda Raad ta haci tur su empenjo pa yega na un acuerdo entre e miembronan y consensus pa cu e decision. Asina ta descarta e posibilidad cu decision di un miembro so ta prevalece. "E miembronan di Raad ta wordo escohi di un forma cuidadoso y cu tur transparencia. Na momento di nan nombracion ta conoci cua ta e otro funcionnan cu nan ta eherce" e comunicado ta sigui bisa.

TAREA CONSTITUCIONAL

Cumpli cu su tarea constitucional, cu ta encera entre otro mira conceptonan di ley di un forma critico, no ta facil pero di suma importancia den e estado di derecho democratico. Conseho Consultativo ta conciente cu no ta tur hende por anda cu critica  y tambe cu no ta tur hende sa e funcion, posicion y importancia di Conseho Consultativo. Di personanan cu no tin di haber cu gobernacion por spera esaki posiblemente y expresionnan asina, aunque con inhusto y incorecto nan por ta, mester wordo laga pa locual nan ta: afirmacionnan infunda y robes.

EXPRESION INNACEPTABEL

Di gobernantenan, sin embargo, expresionnan asina ta inacceptabel. 

Cu expresionnan asina ta wordo accepta door di algun representante di pueblo cu aprobacion, ta sumamente tristo. 

RELACION DEN GOBERNACION

Relacionnan den gobernacion ta wordo poni asina inecesariamente na peliger y esaki no ta  favorece un bon ehecucion di e proceso legislativo y bon gobernacion. 

" Sin embargo Conseho Consultativo lo sigui haci su empenjo pa cumpli cu su tarea constitucional, cu tur independencia y imparcialidad, cu e unico meta pa yega na leynan corecto y di bon calidad", e comunicado ta finalisa bisando.