RBC ta sponsor exposicion “Lens di mi wowonan”, celebrando Dia di Prensa 2016

ORANJESTAD  – RBC Royal Bank a sponsor e exposicion “Lens di mi wowonan”, cual ta wordo organisa anualmente den cuadro di “Dia di Prensa”. Pierre Rafini, Market Head Business Banking & Country Manager, RBC Royal Bank Aruba, conhuntamente cu e organisado Sr. Leo Vrolijk, a inaugura e exposicion diasabra anochi 27 di augustus. 

“Nos di RBC ta dedica pa yuda nos clientenan crece y nos comunidadnan prospera. Pa e di nuebe aña nos ta orguyoso sponsor di e exposicion “Lens di mi wowonan”. Di e forma aki nos ta para keto na e rol prominente cu prensa ta hunga den y pa nos comunidad. E tarea di prensa ta di sumo importancia: provee nos comunidad cu noticia y informacion confiabel, actual y profesional. Nos ta balora bosonan trabou importante y awe nochi nos kier duna boso e apoyo y aprecio cu boso merece”, Rafini a elabora. 

E aña aki e exposicion a wordo dedica na tres dama den prensa Arubano: Maritza Faro-Maduro, kende recientemente a cumpli 30 aña trahando den media di comunicacion. Debby Kelly y Gina Werleman, ambos tin tambe como 25 aña ta haci e trabou aki. Segun e organisado Sr. Vrolijk algun tempo atras, fotografia pa prensa, tabata un trabou pa hende homber so, awe esaki a cambia. Casi rond mundo, por mira cu hende muher tambe por haci e trabou aki. Para tras di camara di canalnan di television y hasta tin fotografonan di prensa en general. 

Rafini a señala cu e tema di e aña 2016 ta armonisa cu RBC su strategia. Awendia hende muhe ta tuma un posicion importante den nos comunidadnan y organisacionnan. Tambe na RBC ta balora e importancia di hende muhe den e organisacion y den posicion liderazgo. Diversity & Inclusion ta un desaroyo mundial y Aruba no a keda atras.

E exposicion “Lens di mi wowonan” lo keda habri pa publico general durante oranan normal di Bilbioteca Nacional te cu dia 9 di september. Entrada ta completamente gratis y pueblo di Aruba ta keda cordialmente invita.