Preocupacion di un mayor riba situacion EPI

Apreciabel sr./sra.,

Permitimi un espacio den bo media pa vocifera mi preocupacionnan como mayor di un studiante cu ta studia na EPI.  Cu hopi asombra mi a tuma nota di e ultimo declaracion haci door di SIMAR cu titulo "SIMAR: Managernan di Colegio EPI semper a keda positivo y ta comprometi pa bienestar di enseñansa".  Como mama di un studiante cu tin casi 2 siman sin haya educacion drechi, y cu muy probablemente lo afecta e semester aki p'e, mi ta puntra mi mes con SIMAR por pretende cu nan y Unit Managers ta para na bienestar di enseñansa? Na unda e awa a pasa e hemchi pa mi ta na momento cu mi a scucha cu e Vice-Presidente di SIMAR ta un Unit Manager di EPI, y cu tin otro miembro den bestuur di SIMAR cu ta docente na EPI y tambe tin otro lasonan di relacionan personal entre docente di EPI y otro bestuurslid di SIMAR!  Si e informacion aki NO ta corecto mi ta pidi SIMAR pa por fabor aclarea esaki y sali afor bisa cu no tin ningun laso, ni ningun persona cu ta forma parti di directiva di SIMAR y ta traha como Unit Manager, cu lo por tabata un influencia riba nan determinacion pa stroba apertura di e aña escolar na EPI.  Ki tipo di ehempel esaki ta pa e hobennan cu ta purbando di mehora nan mes, y sigura un miho futuro por medio di un diploma? Cu cueste loke cueste semper kies pa bo interes personal prome cu interes general? Mi a lesa cu SIMAR y Unit Managers ta bisa cu esaki no ta bay over di placa, si no organogram, y nan derechonan. E discusion por ta over di placa, organogram, tarea, orario di trabou, e color di uniform of e tipo di coffee cu ta sirbi! No ta existi NINGUN motibo cu ta hustifica di stop di eherce bo trabou cu studiantenan ta depende riba bo pa haci. Esey ta impordonabel! Mi lo keda hopi pendiente di wak con e situacion aki lo sigui desaroya y mi ta spera cu SIMAR y Unit Managers ta cla pa asumi nan responsabilidad pa e consequencianan pa mi yiu y otro studiantenan cu nan a causa intencionalmente.   

Atentemente, un Mayor desapunta y preocupa!