Traspaso di Valero pa gobierno di Aruba ta un hecho

ORANJESTAD - Durante un ceremonia di firmamento den e sala di Conseho di Minister nobo den edificio di Cocolishi, traspaso di propiedad di Valero pa gobierno di Aruba a tuma luga. Parlamentarionan di fraccion di partido AVP tabata presente, tur Minister, ehecutivo y conseheronan huridico di Valero y team negociado completo. Tabata momentonan festivo, di alegria, emocionante, pero na mes momento un poco nostalgico pasobra ta cera un capitulo pa habri un otro. Valero cu pa hopi aña tabata un bon partner di Aruba ta bay pa haci luga pa CITGO. 

REACCION EMAN

Prome Minister Eman: "Awe ta un dia historico. Den pasado nos a yega di habri e refineria bek, momentonan cu tabata importante pa Aruba. E biaha aki e reapertura ta bay acompaña pa un hecho historico, pasobra pa prome bes Aruba ta bira doño di e refineria. Esaki despues di 92 aña cu e refineria a establece su mes na Aruba." Awor Valero ta pasa su propiedadnan pa gobierno di Aruba cu na mes momento ta bay den un lease deal cu CITGO Petroleum Corporation pa opera e refineria.

REACCION MARTIN PARISH (VALERO)

Martin Parish, CEO di Valero, a bisa cu esakinan ta momentonan 'bittersweet' p'e. "Mi ta aprecia masha tanto e bunita palabranan di Prome Minister y den nomber di Valero kier gradici'e pa esey. Loke ta tumando luga awe ta bon pa Aruba. Mi ta haya masha 'great' cu e refineria ta habri bek." Parish a bisa di ta aprecia e trabou duro cu a wordo haci di tur banda pa por a yega na firmamento di e documentonan di traspaso. E tabatin palabranan di masha elogio pa Minister de Meza pa su perseverancia, pa pusha duro apesar di contratiempo y a logra. "This is quite impressive".  Pa Richard Arends, lider di e team negociado, Parish tabatin hopi elogio. "Dia y anochi, durante e ultimo lunanan mi tabata den contacto cu ne y segun mi e ta e persona cu mas mi a yega di ‘text’ den mi bida." A sigui un merecido aplauso despues di esaki. 

DE MEZA

Minister Mike de Meza a bay bek den tempo y a recorda esnan presente con na 2009 a bin haya e refineria cera. "Tabatin hopi deliberacionnan entre nos mes y tambe cu Valero pa mira kico haci pa habri'e bek. Nos a bay hopi caminda hunto cu Valero, hopi hende tabata envolvi pasobra reapertura di e refineria tabata un prioridad grandi. Pa Richard Arends de Meza tabatin palabranan special di aprecio. Un homber cu ultimo tempo no tabata drumi, de Meza a conta. Un awacero di aplauso a sigui.  Despues tur hende a hisa nan glas di champagne pa brinda riba e exito di e dia.