Presupuesto 2017 di pais Aruba entrega na Parlamento

ORANJESTAD - E presupuesto 2017 di pais Aruba a keda entrega diaranson atardi na presidente di Parlamento Marisol Lopez manera cu NoticiaCla.com a anuncia anteriormente. Minister di finanza Angel Bermudez a entrega esaki y tabata contento cu e la logra esaki compara cu añanan anterior cu esaki no tabata wordo entrega na tempo. "Parlamento tin tur tempo pa analisa esaki awor" Bermudez a declara na momento di e entrega. 

E INTENCION

Manera cu NoticiaCla.com a raporta anteriormente, awe presupuesto 2017 tabata programa pa keda entrega na Parlamento. Presidente di Parlamento Marisol Lopez Tromp a confirma esaki pa NoticiaCla.com diaranson mainta. "Mi ta pendiente pa e entrega di e begroting di Land awe door di minister" Lopez a bisa den un declaracion cortico. E ora no tabata conoci ainda, pero e tabata planea pa awe. Cu esaki, e minister encarga cu finanzas, Angel Bermudez ta cumpli cu su promesa di entrega e presupuesto te hasta prome cu tempo cu pa ley, ta 1 di september. E mandatario recientemente a informa cu e intencion tabata pa posiblemente entrega esaki prome cu 1 di september. 

REACCION 

Parlamentario Hulandes pa VVD Andre Bosman a reacciona riba e entrega aki e siman aki. "Ta keda e pregunta si e presupuesto ta balansa", Bosman a bisa riba e raportahe di NoticiaCla.com mas tempran e siman aki riba e entrega di presupuesto. Tambe Bosman tabatin pregunta riba e situacion di CITGO, den sentido cu si e presupuesto ta refleha gastonan pa CITGO. "E pregunta ta si e gastonan pa e pipa di gas pa e refineria ta inclui (den e presupuesto)" Bosman a sigui bisa. 

REALISTICO

Den pasado presupuestonan a keda entrega na tempo, pero despues a resulta cu esaki no tabata realistico mirando cu varios asunto no a keda inclui of no tabata calcula realisticamente. Otro presupuestonan cu si tabata mas serca di e realidad, a keda entrega hopi laat, te hasta despues cu aña a bolter, den cierto caso.