Stichting Parkietenbos kier Gobierno cera dump pa fin di aña

ORANJESTAD - Stichting Parkietenbos representando e barionan di Kas Paloma, Simeon Antonio, Parkietenbos, Buena Vista, Mahuma y besindario recientemente a reuni cu ministro di medio ambiente Mike de Meza y promer ministro Mike Eman pa asina haci entrega di un manifiesto na Gobierno. E documento entrega ta urgi Gobierno pa cera e dump na Parkietenbos mas pronto posibel ya cu ta basta tempo caba cu el a yena y hasta bay over y basha den lama contaminando e area cu un cantidad di material dañino y hasta toxico pa medio ambiente. Manera ta conoci e dump aki tin mas di 75 aña ta existi y a bira awor un menasa pa salud di habitantenan di e bario y alaves un molester enorme. Sin un control adecuado tur sorto di material ta ser tira riba e dump aki manera; kimiconan, bestia morto, resto di cuminda, resto di sushedad humano, tire, asbest y un cantidad di otro materialnan dañino mas. Apesar cu recientemente un intento a ser haci pa modernisa y mehora e maneho y procesamento di sushedad, esaki lamentablemente no a resulta, sinembargo e comunidad di e besindario no tin idea di soporta mas tardansa pa un solucion. Huma y holor stinki, djaca, musca y holor malo ta azota e bario tur siman. Durante e reunion concerni presidente di Stichting Parkietenbos Sra. Edith Koolman a lesa e manifiesto su contenido y na nomber di e habitantenan di e bario y firmantenan di peticion a urgi Gobierno pa tuma un decision pa cera e dump no mas tarda cu 31 di december 2016. Gobierno di su banda a informa cu nan ta consiente di e situacion deplorabel di e dump y cu nan ta trahando riba diferente alternativa a corto y largo plazo. Miembronan di e fundacion a insisti cu no solamente e dump tin cu ser cera pero alabes e area tambe lo tin cu ser sanea. Si un horcan mester pasa Aruba of un poco cerca di nos isla, e dump aki lo por causa un berdadero desaster pa e besindario y Aruba. Stichting Parkietenbos ta spera sinceramente cu entrante otro aña e maneho di sushedad di Aruba ser transforma den un proceso moderno y sostenibel bon pa medio ambiente y pa nos futuro generacionnan.