Detencion Chris Brown tin organisadornan CNSJ ocupa

WILLEMSTAD - Tanten cu organisadornan di e di 7 edicion di Curacao North Sea Jazz Festival no informa contrario, tin cu asumi cu e cantante Chris Brown su presentacion diabierna anochi awor lo continua. E artista cantante cu ta programa pa cera e di dos anochi di Curacao North Sea Jazz Festival na Corsou diabierna awor, a keda deteni diamars atardi na su cas na Merca, riba sospecho di asalto cu un arma. Esaki a sosode a base di un acusacion di menasa di morto cu un arma na cabes di un modelo na cas di Brown. Brown a desmenti e cargonan ora cu polis a yega na su cas, unda cu e tabata henter dia. E dia tabata uno largo unda cu Chris a cera cu mes den e cas, aunke e mes ta desmenti cu el a 'cera su mes' den e cas. No ta conoci kico ta pasa cu Brown, cu si su presentacion na Corsou ta na duda, of cu si e ta logra presenta toch. Te cu diamars anocni, no tabatin nada diferente riba e website di e festival na Corsou. NoticiaCla.com a compronde di fuentenan cu for di organisadornan, nan no por a bisa nada otro cu 'nos ta den combersacion cu management di Chris Brown'. Pues tin cu warda wak kico ta pasa. 

DUDA Y RUMOR INICIAL

Prome cu e episodio aki, tabatin suficiente rumornan caba riba su presentacion na Corsou, cu a pone cu organisadornan mester a emiti un boletin pa desmenti tur e rumornan aki y sigura cu su presencia ta sigura y confirma na Corsou. Pero cu su detencion awor, esaki no ta sigur mas. Tanten cu organisadornan di e festival no duna ningun informacion contrario, lo mester asumi cu Brown lo ta presente diabierna na e festival. El a bira si topico di combersacion riba rednan social, unda cu hende ta cuestiona kico lo sosode aworaki. Tin informacion cu un grupo di 5.000 fanatico lo ta presente netamente pa e presentacion di Brown.