Ehecutivonan di Valero a yega Aruba y ta firma diaranson

ORANJESTAD - Den un avion priva ehecutivonan di Valero a yega Aruba den oranan di diamars merdia pa firma e ultimo documentonan pa traspaso di e tereno y propiedad pa Aruba. Despues e documentonan ta bay Parlamento pa wordo discuti y trata. E fecha di apertura di CITGO pa motibo di contratiempo a dura mas cu loke a pensa, pero awor caminda ta hancho habri pa asina dia 1 di october e trabounan por cuminsa. 

YEGADA

Na General Aviation Airport di Aruba, ministernan Eman y De Meza tabata spera e grupo di ehecutivo di Valero cu te siman pasa ainda tabata den combersacion cu e team di Aruba pa por a yega na e miho deal posibel pa e isla y su hendenan. Un di e logronan sigur ta e hecho cu Aruba ta bira doño di e refineria. Eman tabata satisfecho y a expresa esaki tambe. "Por bisa cu awe cu yegada di ehecutivonan di Valero na Aruba nos ta yegando e punto culminante di e esfuerso grandi cu gobierno, y principalmente colega de Meza, a bin ta haciendo." Eman a gradici e team negociado cu a traha pa periodonan largo deliberando den forma intensivo pa por a yega na unda Aruba kier a yega cu e refineria. E acuerdo cu CITGO mes a keda firma algun tempo pasa caba, pero tabata e acuerdo cu Valero cu mester a keda cla y cu a dura un poco. Pero awor esey tambe ta bay tuma luga. 

FIRMA DIARANSON

"Mañan nos ta firma e acuerdo cu Valero ta bay traspasa su propiedad pa pais Aruba y asina e acuerdo cu CITGO por bay Parlamento. Nos ta spera cu den luna di september nos ta keda cla, pa na luna di oktober CITGO por cuminsa traha riba e refineria. Inversionnan grandi ta bay wordo haci y ta bay bin mas di 2 mil cupo di trabou." Eman a splica cu tabatin algun asunto di impuesto cu mester a keda regla cu Valero y cu nan a keda cla cu nan. E tabatin hopi palabra di aprecio pa e ehecutivonan di Valero cu semper a coopera cu Aruba ora tabatin mester.