Ehecutivonan Valero na Aruba awe pa firma deal final

ORANJESTAD - Ehecutivonan di Valero ta yega Aruba awe pa nan firma acuerdo final cu gobierno di Aruba probablemente diaranson. Asina e mandatario di energia Mike de Meza a informa riba su pagina di Facebook. Manera raporta caba, e mandatario a bolbe den fin di siman for di Houston unda cu a reuni cu ehecutivonan di CITGO y Valero pa e parti final di e deal. "Ta premira cu lo caba cu e leynan y cu e dia efectivo pa e areglo nobo drenta na vigor lo ta dia 1 di october 2016" de Meza ta bisa, enves di e fechanan inicial di 1 di augustus cu despues a bira 1 september. Ningun di e dos fechanan aki a materialisa, debi na e tardansa cu e deal cu Valero cu no a keda cla na tempo. 

KICO TA FIRMA

E loke cu tin cu firma diaranson awor, ta e acuerdo final di transpaso di refineria pa Gobierno di Aruba segun e mandatario y asina reconoce e operador nobo CITGO. " Tambe ta atende e compania Valero Marketing & Fuels Supply cu ta bende gasolin, diesel, kerosin y jetfuel cu lo pasa awor pa e compania nobo Refineria di Aruba, di cual Gobierno di Aruba lo ta doño 100% di dje" e mandatario a sigui bisa. Durante un entrevista na television, e mandatario no kier a menciona e suma cu gobierno mester a haya di Valero, pero a papia di decenas di miyones. 

PARLAMENTO Y RAAD VAN ADVIES 

Segun e mandatario, pa awor, e unico asunto huridico cu ta keda falta ta e aprobacion final di Parlamento. E mandatario a mustra cu e ta mira cu e organo mas halto di nos pais lo sostene e leynan aki den forma unanime. E ley ta na Raad van Advies awor, lo mester pasa Comision Central den Parlamento pa despues den un reunion publico di Parlamento esaki wordo aproba. "Ta spera cu e reunion aki tuma lugar prome cu fin di september. Si tur cos bay riba plannan lo por anticipa cu e fecha di transpaso lo ta dia 1 di october 2016" e mandatario a declara riba su pagina di Facebook.