Lopez: 'No ta cancela e reunion sin splica pakico'

ORANJESTAD - E hecho cu e fraccion di AVP no a presenta pa e reunion dialuna mainta pa trata e cambionan di ley di Codigo Civil, ta refleha mas riba nan cu riba e presidente di Parlamento Marisol Lopez. "Mi no ta bay cancela e reunion sin splica e pueblo pakico" Lopez a bisa, hustificando e motibo cu a inicia e reunion, en bes di cancela esaki sin mas. "Mi ta habri e reunion y ta trata e dos cartanan (cu el a ricibi di entre otro fraccionan y ministernan respectivo cu peticion pa pospone e reunion) pa despues cancela e reunion y pone fecha nobo". Pero loke a sosode segun Lopez, ta algo completamente nobo, cu ta prome bes cu mi ta wak esaki unda cu un mayoria di fraccion di AVP no a ni bin, ni presenta" Lopez a bisa. Esaki mientras cu fraccion di MEP y PDR si a bin. E ministernan lo mester a presenta aunke nan a pidi un schorsing, pa splica e schorsing, of contesta pregunta di otro puntonan cu solamente e amienda. Mirando cu no tabatin quorum, (por lo menos 11 miembro di parlamento), Lopez a pospone e reunion te otro siman diahuebs 8 di september pa 10 or di mainta.