Diabierna no ta cobra ‘eigen bijdrage’ mas na Eerste Hulp

ORANJESTAD – Minister di Salud y Hospital Alex Schwengle no tin cu bay guerra mas. E motibo ta cu Hospital awor si lo stop e cobransa di e suma di 159 florin na Spoed Eisend Hulp, si resulta cu e ‘emergencia’ no ta un emergencia. Mas tarda diabierna, lo sali un comunicado di parti di Hospital, Gobierno y AZV cu ta confirma esaki publicamente. E mandatario encarga cu Salud, a confirma esaki diahuebs atardi laat na NoticiaCla den forma di un primicia, indicando e noticia mes no a sali ainda. Cu e acto aki, e ta scapa di cuminsa un ‘guerra cu hospital’ unda cu por a uza forza legal constitucional, pa para e cobransa aki.

 Schwengle a sigura NoticiaCla cu e no ta cambia su ponencia cu e no ta haya bon cu Hospital a tuma un decision di cobra pashent na SHE siendo cu no tabata e palabracion. Algun siman pasa, e mandatario a declara mescos, esta cu ta para e cobransa y cu e la haya siguransa di Raad van Toezicht cu e lo a wordo para. Ora cu esaki no a sosode, e mandatario a keda mal mira y te hasta a wordo jama pa gañado. E no a tuma, pero mes momento e la opta pa no bay guerra. Den mesun rosea e ta admiti si cu hospital tin rason pa cobra, pero e ehecucion sinembargo no ta esun corecto. “Eynan bo tin cu cuminsa”.

 E mandatario a confirma tambe cu hospital no a gusta e intermediacion pasobra nan ta sinti cu nan tabatin rason. Algo cu e mandatario a admiti. Despues di un serie di reunion, e mandatario a bisa cu partidonan a ‘concorda’ y lo bin un statement conhunto pa para e suma. “Nos a yega na un acuerdo cu no a wordo publica ainda” e mandatario a confirma na NoticiaCla. E mandatario a mustra cu e acuerdo sera awor ta cu 1. Ta para e suma di cobransa, 2. Ta regla e servicio di marduga di 1e lijn y 3. Ta stipula un maneho cu tur hende ta di acuerdo nobo. Entre tres luna e acuerdo aki lo mester ta cla.