Wever: Ministernan mester tabatin desencia pa bin Parlamento

ORANJESTAD - E hecho cu no tabatin sosten den sala di Parlamento pa e reunion publico riba codigo civil continua, ta algo nobo pa lider di fraccion di MEP Evelyn Wever Croes. "Pa mi ta nobo cu dos minister ta nenga di bin Parlamento" Wever a bisa na inicio di e reunion ora cu a pidi punto di orden. "Sikiera nan por tabatin e decencia di bin splica cu nan mester di mas tempo. Esaki ta algo hopi tristo y ta mustra falta di seriedad. Bo no por hisa benta algo den comunidad, trece tanto desunion den comunidad, y keda cas, scondi, drumi morto na soño y mustra con iresponsabel bo ta" Wever a sigui bisa. 

MEP AUSENTE

Loke e fraccion geel ta wordo hopi cuestiona di dje ta ausencia ora di cierto reunionan. Wever a uza esaki tambe pa mustra con cos ta diferente ora cu nan no ta presente. "Laga si ta nos a keda sin bin. Mundo ta caba. Tur potret riba internet caba tur caminda" Wever a sigui bisa. Segun e lider di fraccion geel, ta prome biaha den historia di Aruba cu ministernan ta falta respet di e forma aki na Parlamento. 

POSPONE REUNION

No obstante e critica, MEP a mustra cu nan tambe ta dispuesto pa coopera cu un posponemento manera cu fraccion di PDR tambe a pidi. Tambe a pidi pa cambio di e forma cu ta trata e tema di union civil. No kier trat'e den un amienda, pero den un forma di un ley mes. "Nos tin un proposicion y ta cla pa entrega esaki" Wever a bisa.