Sneek: AVP no a uza poder door di no presenta pa reunion

ORANJESTAD - E loke cu fraccion di AVP a haci dialuna mainta di no presenta pa e reunion publico di Codigo Civil, no tabata pa 'mustra poder'. Por lo menos asina Marlon Sneek a sigura NoticiaCla.com, papiando na nomber di e fraccion. E fraccion su actuacion a pone cu no tabatin quorum pa e reunion, cu mester a pospone esaki un biaha mas. Segun Sneek, nan a haci varios peticion pa pospone (nan ta uza e palabra 'schors') e reunion pa por prepara miho pa esaki, pero e presidente di Parlamento Marisol Lopez no a duna oido na esaki. "Toch no ta duna oido na esaki dus ta di lamenta cu na momento cu mira cu e mayoria (tur fraccion segun Sneek) ta pidi uitstel, toch (Lopez) ta purba di sigui pusha un reunion toch" Sneek a bisa. "Nos no sa kico e meta scondi ta tras di esaki pa scondi pusha e reunion toch" Sneek a bisa. E ta haya cu mester duna oido ora cu mayoria pidi bo pa buta otro fecha pa e reunion aki. 

NO TA UZO DI PODER

Sneek no kier papia di poder uza dialuna mainta. E ta mustra cu e fraccion den tur forma, ta un fraccion humilde cu tin respet pa e 13 asiento y e 12 prome cu esey. "No ta abusa!" Sneek a mustra. "Niun dia e fraccion (berde) no a pidi su cabez, kiermen cu si nos ta papia di poder, nos por a yama reunion, exigi cu nos ta get rid di e voorzitter. Y esey nos no a haci" Sneek a bisa, indicando cu e fraccion no ta traha asina. "Si mi ta kere cu mester tin respet ora cu mayoria ta pidi bo algo", Sneek a sigui bisa. E reunion a keda posponi pa dia 8 di september pa 10'or di mainta.