Departamento di asuntonan social tin directora nobo

ORANJESTAD - Departamento di Asuntonan Social tin Directora nobo. Dialuna mainta Minister di asuntonan social Paul Croes a tene un reunion importante cu directora nobo Glenda Hernandez kende desde 1 september 2016 lo ta e directora nobo di Departamento di Asuntonan Social. Pa algun tempo caba tabata tin un proceso andando, unda a busca solicitantenan den e sector aki, tanto na Aruba como den exterior, pa asina asumi e funcion di director di e departamento. Despues di pasa e proceso manera mester ta, sra. Hernandez a resulta e persona cu ta cumpli cu tur criteria necesario pa por asumi e funcion  importante aki cual ta directora di Departamento di Asuntonan Social.  Minister Croes su vision ta pone enfasis riba personanan cu limitacion, personanan financieramente vulnerable, fortifica famianan den nos sociedad y nos hobennan. Minister Paul Croes ta contento cu desde prome di september,  por conta cu un directora nobo na DAS cu por yuda brinda e apoyo social mas miho na nos comunidad. Banda di esaki, loke tambe ta hopi importante ta pa sra. Hernandez por apoya e trahadornan di e departamento pa miho motivacion, manera di trabou, infrastructura etc. Minister Croes ta convenci cu e directora nobo lo trece cambionan positivo pa e departamento y ta desea sra. Hernandez exito den su funcion nobo.