Damanan Venezolano ilegal a 'inventa' atraco na Perle D'or

ORANJESTAD - E supuesto atraco raporta diadomingo anochi na e hotel Perle D'or a resulta di tabata un atraco 'falso'. Dialuna atardi vocero interino di polis Liliana Rasmijn a raporta cu Atraco Team a haci su investigacion tocante e supuesto atraco ayera na Perle d'or y a conclui cu no ta trata di nuin atraco. A resulta cu e 3 damanan Venezolano a inventa e storia. E damanan Venezolano ta ilegal riba nos isla mas cu 2 siman caba y di 4 dama a aparece tambe awe y entrega su mes na Guarda nos Costa. E damanan aki a inventa e storia cu nan lo a wordo atraco siendo cu investigacion a saca afo cu no ta asina. Nan ta aworaki den man di Guarda Nos Costa pa wordo deporta for di Aruba.

E RAPORTAHE INICIAL

Diadomingo anochi NoticiaCla.com a haya informacion di polis cu Aruba a conoce otro atraco riba turista. E informacion tabata papia e biaha aki di dos homber arma cu cara tapa a atraca tres turista kedando na e boutique hotel Perle D'or na Boegoeroei. Polis a raporta cu pa mas o menos 8:02 pm diadomingo a drenta un yamada na central di polis cu un atraco lo mester a tuma luga na e sitio menciona. Na yegada di patruya  a pidi di biaha pa atraco team, polis forensico y slachtoffer hulp. Aparentemente 3 hende muher lo mester a wordo atraca den nan camber cu a wordo habri cu un yabi door di un hende muher compaña pa dos hende homber cu un arma di candela den man y cara tapa y nan lo a papia spaño. Nan ta declara cu lo mester a bay cu mas o menos  cu $1000. Nan lo a reconoce e muhe cu a drenta e camber prome. Nan lo ta na Aruba pa un photoshooting pa un calender. Nada di esaki awor a resulta di ta berdad.