Balashi y Tropical Bottling sponsornan principal RFC III

ORANJESTAD - The Redemption Championship, RFC III ta na caminda y recientemente organisadornan y sponsornan a reuni pa “kick off” e benta di ticket den un conferencia di prensa. 

Como e sponsor principal, Brouwerij Nacional Balashi y The Tropical Bottling Company, cu nan productonan Balashi, Chill, Dewar’s, Grey Goose, y Bacardi a anuncia e peleanan cu lo tuma luga riba dia 28 di october proximo, cuminsando pa 6or di atardi na Entertainment Center. E evento tin como meta pa “showcase” e atletanan Arubano internacionalmente. E miho bringadonan di MMA lo enfrenta otro, y bringadonan di exterior, den ring pa peleanan di caliber halto cu a conta den pasado cu presencia y atencion di scoutnan internacional.

RFC III ta wordo organisa pa MTKA Muay Thai Kickboxing Aruba, International Mix Fight Association y Manolo Valdez, kende ta director promotor RFC Aruba.

E 12 peleanan ta inclui top deportistanan di MMA di Aruba reconoci internacionalmente manera Chiara Petrocchi y Evan Nedd, como tambe atletanan for di Venezuela, Colombia, Corsou, Jamaica, Republica Dominicano, Merca y Hulanda.

Ticketnan pa RFC III ta obtenibel na El Gallo Rojo, Ritz, Los Cafeteros Restaurant, Fruteria Virgilio, Manuelito’s Sports Bar, Final Touch Barbershop y Espija de Oro. Ticketnan VIP ta obtenibel solamente na Basari Aruba.