Lopez: No a cancela reunion publico di Parlamento pa awe

ORANJESTAD - E reunion publico di parlamento ta continua normal awe. Por lo menos esey ta e intencion di presidente di Parlamento Marisol Lopez Tromp na NoticiaCla.com dialuna mainta. "Mi no a cancel'e" Lopez Tromp a bisa e portal aki. Tabatin varios rumor ta circula cu a cancela e reunion pa un posibel otro fecha. Pero esey a keda desmenti. Loke si Lopez a confirma, ta cu tin varios peticion a drenta pa esaki keda posponi. "A drenta si 2 verzoek pa pospone" Lopez a confirma. "Uno di Bikker cu ta pidi algun dia extra namens e otro fracties tambe, aunke cu e otro 2 fractieleiders no a firm'e carta si, pero nan a indica cu nan mester mas tempo si" Lopez a sigui bisa. E ta confirma tambe cu el a ricibi un carta di minister di husticia Arthur Dowers cu ta bisa cu e ta sostene 'e gevoelens di e mayoria di Statenleden' pa un schorsing. "Lo mi habri e (reunion publico)  awe y trata publicamente y transparentemente e 2 cartanan cu a drenta pa tur hende ta debido informa" Lopez a finalisa bisando. 

CANCELACION SIMAN PASA. 

E reunion pa trata cambionan di e Codigo Civil manera ta conoci, a keda posponi siman pasa manera tabata conoci. Den combersacion mas amplio cu presidente di Parlamento Marisol Lopez Tromp, ta fraccion di AVP a pidi un votacion si e reunion por a sigui si of no, of si mester a pospone esaki pa duna mas tempo pa preparacion. E votamento finalmente a resulta den 18 pro pa cambia e fecha y 1 contra. E unico voto contra tabata di propio presidente di Parlamento Marisol Lopez Tromp.

DOWERS A PIDI PROME PA POSPONE

Tabata minister Dowers cu inicialmente (for di mainta) a pidi mas tempo pa por contesta un carta manda pa parlamentario Desiree de Sousa Croes riba un proposicion cu lo por a evita tratamento completo di e amienda cu ela entrega. Lopez sinembargo a bay riba e punto di salida cu e ley aki tabata 5 aña den preparacion unda cu hopi instancia a reuni riba esaki pa e por a keda cla pa trat'e finalmente. Ademas, tabata sa dos luna prome cu e ley aki lo a wordo trata dialuna. No obstante esey, tanto minister Dowers y (Paul) Croes a pidi pa schors esaki pa por a reuni den e.o.  Conseho di Minister. Tur otro fraccion tambe a pidi pa pospone e reunion aki. Mientras cu tur a pidi pa pospone, tur esnan cu a vota, a haci esaki basa solamente riba e amienda riba union civil, siendo cu e ta solamente un parti di e ley di Codigo Civil. Ora cu a bira cla cu ta tur hende tabata kier un posponemento, esaki a sosode a base di votamento.