California Lighthouse completamente restaura y habri atrobe!

PALM BEACH - Despues di un periodo largo di trabou di restauracion, su excelencia Gobernador Fredis Refunjol hunto cu minister Otmar Oduber a efectua e 're-apertura' di e faro conoci como California Lighthouse dialuna atardi. "Local y turista lo por sinti e vibracionnan cu ta brota for di cada muraya di nos Faro cu pa añanan tabata e guia di nos piscadornan y awe ta un imagen di e futuro prospero di nos nacion" Oduber a bisa na e ocasion aki. 

RESTAURACION

Manera ta conoci, e faro na Westpunt di mas di cien aña bieu a pasa den un restauracion completo cu a inicia na luna di september di 2015. Durante e restauracion a descubri detayenan manera por ehempel cu e timpannan cual ta e decoracion triangular cu por aprecia riba e bentananan di e faro di California cu tabata forma di un mezcla di santo, koraalsteen chikito y pidanan di panchi di dak.   

STICHTING MONUMENTENFONDS ARUBA

E proyecto aki ta ser realisa pa Stichting Monumentenfonds Aruba logrando asina un di e metanan principal di e fundacion cual ta pa preserva nos pasado pa futuro generacionnan. E proyecto aki ta posibel danki na Nationaal Restauratie Fonds di Hulanda y tambe Aruba Bank. Despues cu na principio di aña 2015 a haci oficial cu e faro a bira propiedad di Stichting Monumentenfonds Aruba e trabounan a cuminsa inmediatamente pa asina por a yega na e destaho publico. ECOARUBA line Development NV a haña e proyecto y mesora bou di guia di Monumentenbureau como e lider di e proyecto y IMD Aruba como e architecto, a cuminsa cu e proyecto grandi di restaura un di e monumentonan mas bishita di Aruba cual ta nos California Lighthouse.