Ilan Chester ta remplasa Burt Bacharach na CNSJ

WILLEMSTAD - "Nos ta contento di por anuncia e remplasante di Burt Bacharah. Ilan Chester lo ta riba stage Celia riba diasabra 3 di september ". Asina vocero di e festival, Percy Pinedo ta informa diabierna. Manera ta conoci, Bacharach a cancela debi cu ela kibra su brasa. 

Ilan Chester a nace na Israel y a crece na Venezuela; na 2010 e la gana un Grammy Award y ta un cantante multi talentoso, e ta cantante y compositor cu mas di 35 composicion musical riba su nomber. 

Ilan Chester a crece cu influencia di melodia Franses, Judiu y Italiano cu e la tende tempo cu e ta mucha. Despues e la haña mesun amor pa R&B Mericano (Stevie Wonder, Ray Charles) ye rock Ingles (the Beatles, Yes, Jethro Tull). Asina ela desaroya su musica y esaki ta contene elementonan di musica clasico, jazz, Afro Caribense y musica tradicional di Venezuela.

Como ex miembro di grupo di rock y pop manera Trams, Way y Melao, Ilan Chester a graba 4 disco pa mercado Ingles. Y na inisio di su carera como solista na 1983 Ilan Chester a bira un artista masha keri na Venezuela y den henter Latino Amerika y tabata yena salanan y teatronan grandi.

Despues di algun disco memorabel, entre cua Amistad, Solo Faltas Tu, Asi Y Cancionero del Amor Venezolano, Vols 1,2 & 3 el a la haña mas atencion internacional cu e disco titula Corazon navideño cu a gana disco di Platino y tambe e coleccion di 6 disco titula Tesoros de la Musica Venezolano, dia cua na Venezuela so e la bende mas cu 500.000 den algun siman.

Rond mundo criticonan y otro artistanan ta reconoce Ilan Chester como un dje compositor y cantantenan mas talentoso na Spaño. Cantantenan fama manera Marc Anthony, Cheo Feliciano y Chayenne a yega na interpreta su cancionnan y rond mundo e tin masha hopi fanatico.