DPS A entama caso sumario contra Unit Managers di EPI

ORANJESTAD - "Ami lo no bay tuma ningun paso pa bisa nan ( e alumnonan) pa no haci'e" ta palabra di director di Whitney Kock, director di Directie Publieke Scholen (DPS). Kock ta referi na e marcha di e alumnonan di EPI sector Hospitality & Tourismo diabierna mainta. Pa loke ta e welga di e unit managers, Kock a confirma cu DPS a entama un caso sumario pa forsa e managernan pa reanuda trabou mas pronto cu ta posibel. 

CASO SUMARIO

Segun Kock, a ofrece e managernan diferente cos, pero no a keda otro opcion pa entama un caso sumario. "Nos a entama un spoed kortgeding pa logra cu e unitmanagersnan ta bek na pia di trabou mas pronto cu ta posibel ainda" Kock a sigui bisa. 

PETICION DI UNIT MANAGERNAN

E unitmanagernan ta pidiendo e.o. un toelage (aumento) y nan ta bisa cu nan no a haya atencion pa esaki pa 10 aña caba. Segun Kock, tur hende a sinta y tende e preocupacion y a bay wak den margen di ley kico por ya cu e diferencia di salario no tabata suficiente. A bin bek riba un conseho unda cu ta bisa cu e diferencia lo mester ta minimal dos periodiek. Riba esaki a haci un calculacion cu un toelage di 2.5% riba nan salario y esey lo cumpli cu e conseho haci. A propone esaki na nan, y esaki a wordo acorda pa conseho di minister di Aruba. "Nos no por bay tuma un desicion cu ta pafo di e margen di ley" Kock a bisa, refiriendo na e resistencia di e unit managernan. Segun Kock, ora cu a duna e calculacion di e aumento, esaki tabata cu forsa retroactivo cu lo a costa pais Aruba un suma di 100 mil florin pa e unit managernan. Pero e unit managernan tabata kier mas. "Ta pa'mi incomprendibel con un sindicato di maestro cu ta bringa pa e hendenan aki pa ranca como 1 miyon di pais Aruba, caminda ami abo y nos tur mester contribui p'e" Kock a bisa. A aumenta e suma original ainda pero ni asina e unit managernan no kier a reanuda trabou, segun Kock . "Despues nan a bisa cu (e problema) no ta e placa sino e organogram. Pero nan ta contradeci nan mes" Kock a sigui bisa. Esaki pasobra di un banda nan ta bisa cu ta un lucha di 10 aña largo, pero e tempo ey e issue no tabata organogram. "Es mas, un di e unitnan ta traha cu 3 unit managers y e unit aki tambe ta boga pa organogram" Kock a bisa. A bisa tambe cu a topa nan mitar caminda unda cu docentenan ta haya taak uren pa ondersteun e managernan, mientras cu ta sigui cu e studio di functiehuis y functieomschrijving. "Pa'mi ta incomprendibel cu si bo meta ta werkverrichting, mi ta pone un formatie eenheid disponibel, y bo ta nengu'e. Mi ta dunabo un suma di 100 mil florin y bo ta sigui nenga" Kock a sigui bisa. "Tur tres motibo di critica, accion a wordo tuma, pues no ta resta motibo husto pa continua cu un accion!" Kock a bisa.